ՏԵՍԱՆՅՈՒԹ. Ոստիկանության աշխատակիցները ծեծի են ենթարկել, խոշտանգել «Դոն Պիպոյի» շինղեկավարին. քրգործ է հարուցվել

 Ապրիլի 1-ին  «Դաժան ծեծի է ենթարկվել Դոն Պիպոյի շինարարության ղեկավարը» վերնագրով լուր տարածվեց «Հրապարակ» լրատվականում։ 

Հոդվածում և տեսանյութում լրատվականը ներկայացրել էր, թե Վաղարշապատի ոստիկանության քրեական վարչության բաժնի աշխատակիցներն ինչպես են դաժան ծեծի ենթարկել Արթուր Ասատրյանի՝ Դոն Պիպոյի շինարարության ղեկավարին՝ Մխիթար Հովհաննիսյանին։ Այցի պահին Հովհաննիսյանը «Նաիրի» բժշկական կենտրոնում էր` ուղեղի ցնցում եւ սալջարդ ախտորոշմամբ: Նա «Հրապարակ»-ին մանրամասն ներկայացրել էր տեղի ունեցածը: 

Պատճառն, ըստ Հովհաննիսյանի, Արթուր Ասատրյանի հետ աշխատանքային համագործակցությունն է եւ դա առաջինը դեպքը չէր, որ իրեն անհանգստացնում էին ոստիկանության քրեական վարչության աշխատակիցները, որոնք նրան ծեծի էին ենթարկել ճանապարհին` բաժին տանելիս, ապա հենց ոստիկանությունում:

Լրատվականն այսօր կապվել է Մխիթար Հովհաննիսյանի փաստաբան Արման Թամրազյանի հետ, հետաքրքրվել ենք, թե ինչ փուլում է գտնվում իր պաշտպանյալի գործը։

«Այո, քրեական գործ է հարուցվել Հակակոռուպցիոն կոմիտեում՝ խոշտանգման հատկանիշներով, 309.1 հոդվածով, Քրեական օրենսգրքի 2-րդ մասով։ Գործն ուղարկվել է ըստ ենթակայության՝ Ազգային Անվտանգության ծառայության քննչական դեպարտամենտ։ Մխիթար Հովհաննիսյանը ճանաչվել և հարցաքննվել է որպես տուժող։ Ըստ այդմ, նախաքննությունը շարունակվում է։ Նշանակվել է դատաբժշկական փորձաքննություն, պաշտպանյալս ներկայացել է փորձագետի մոտ։ Այս պահին դատաբժշկական փորձագետի եզրակացությունը պատրաստ չէ՝ մարմնական վնասվածքների ծանրության աստիճանի վերաբերյալ։ Մինչ այս պահը չեն եղել առերեսումներ, չի առաջադրվել նաև մեղադրանք»,-ասաց Մխիթար Հովհաննիսյանի փաստաբան Արման Թամրազյանը։