Հունաստանը պահանջում է, որ Թուրքիան մասնակցի ՌԴ–ի դեմ պատժամիջոցներին

Հունաստանի ԱԳ նախարարի առաջին տեղակալ Միլտիադիս Վարվիցիոտիսը հայտարարել է, որ Եվրամիությունը պետք է ճնշում գործադրի Թուրքիայի վրա, որպեսզի վերջինս պատժամիջոցներ սահմանի Ռուսաստանի դեմ, այլապես ռուսական տնտեսությանը ուժեղ հարված չի հասցվի: 
Վարվիցիոտիսը կարճ հայտարարությամբ է հանդես եկել Ֆրանսիայի Առլ քաղաք ԵՄ ընդհանուր հարցերով ոչ պաշտոնական խորհրդին ժամանելուն պես: 

Նա նաև մտահոգություն է հայտնել Ուկրաինայում վերջին իրադարձությունների կապակցությամբ, հատկապես «Զապորոժիեի ԱԷԿ-ին գիշերային հարվածներից հետո», և ընդգծել է ԵՄ-ի ու ՆԱՏՕ-ի անդամ բոլոր երկրների միջև համագործակցության անհրաժեշտությունը, որպեսզի «պատժամիջոցներն իմաստ ունենան» և Ռուսաստանի նախագահ Վլադիմիր Պուտինին դրդեն ռազմավարության փոփոխման: 
«Հենց այդ պատճառով մենք կխնդրենք ԵՄ-ում մեր գործընկերներին ճնշում գործադրել Թուրքիայի վրա, որպեսզի նա կատարի ԵՄ մյուս երկրների պահանջները տնտեսական պատժամիջոցներ սահմանելու վերաբերյալ ։ Առանց Թուրքիայի այդ պատժամիջոցներն այնպիսի ուժեղ հարված չեն հասցնի ռուսական տնտեսությանը, ինչպիսին ցանկանում էինք», - ասել է Հունաստանի ԱԳ նախարարի առաջին տեղակալը ։ 

Հիշեցնենք, որ Թուրքիայի արտգործնախարար Մեւլութ Չավուշօղլուն մարտի 1-ին հայտարարել էր, որ Թուրքիան չի ցանկանում մասնակցել Ռուսաստանի դեմ պատժամիջոցներին։ Թուրքիայի նախագահի ներկայացուցիչ Իբրահիմ Քալընը հայտարարել է, որ Անկարան պետք է գործի՝ հաշվի առնելով մեր երկրի առաջնահերթությունները և չի ծրագրում պատժամիջոցներ սահմանել Մոսկվայի դեմ: Անցած հանգստյան օրերին Արևմուտքի երկրները նոր պատժամիջոցներ են նախաձեռնել Ռուսաստանի դեմ։