Զելենսկին առաջարկել է Ուկրաինայի, Գերմանիայի և Թուրքիայի մասնակցությամբ նիստ հրավիրել

Ուկրաինայի նախագահ Վլադիմիր Զելենսկին առաջարկել է ՄԱԿ-ի Անվտանգության խորհրդի նիստ հրավիրել Ուկրաինայի, Գերմանիայի եւ Թուրքիայի մասնակցությամբ: 

«Առաջարկում եմ առաջիկա շաբաթներին գումարել ՄԱԿ-ի Անվտանգության խորհրդի մշտական անդամ պետությունների գագաթնաժողով Ուկրաինայի, Գերմանիայի և Թուրքիայի մասնակցությամբ՝ Եվրոպայում անվտանգության մարտահրավերներին վերաբերող հարցերը լուծելու համար»,- հայտարարել է նա շաբաթ օրը Մյունխենի անվտանգության խորհրդաժողովում: Բացի այդ, նախագահի խոսքով, նա ՄԱԿ-ի ԱԽ-ին առաջարկում է «Ուկրաինայի համար անվտանգության նոր, գործուն երաշխիքներ մշակել»: 

Զելենսկու խոսքով՝ նման երաշխիքներ այժմ պետք են, քանի դեռ Ուկրաինան չի ստացել ՆԱՏՕ-ի անդամակցությունը, քանի դեռ այն «փաստացի գորշ գոտում է՝ անվտանգության վակուումում»: 

Զելենսկին հավելել է, որ ԱԳՆ-ին հանձնարարել է հրավիրել Բուդապեշտի հուշագրի մասնակից երկրների գագաթաժողով: «Աշխարհում երրորդ միջուկային պոտենցիալից հրաժարվելու համար Ուկրաինան անվտանգության երաշխիքներ է ստացել։ Այդ զենքը մենք չունենք, անվտանգությունը նույնպես չկա։ Չկա նաև մեր պետության տարածքի մի մասը, իսկ ամենակարևորը՝ չկան միլիոնավոր մեր քաղաքացիներ»,- ասել է նա։ 

Նախագահը կարծում է, որ Կիևն իրավունք ունի պահանջել խաղաղեցնելու քաղաքականությունից անցնել Ուկրաինայում անվտանգության և խաղաղության երաշխիքների ապահովմանը: 

«2014 թվականից Ուկրաինան երեք անգամ փորձել է կոնսուլտացիաներ հրավիրել Բուդապեշտի հուշագրի երաշխավոր պետությունների հետ, բայց ապարդյուն։ Այսօր Ուկրաինան դա կանի չորրորդ անգամ։ Ես դա անելու եմ վերջին անգամ։ Ես նախաձեռնում եմ խորհրդակցությունների անցկացում Բուդապեշտի հուշագրի շրջանակներում», – հայտարարել է նա ։