«Մենք չենք կարող հավերժ ձիթենու ճյուղ առաջարկել Մոսկվային»․ Շառլ Միշել

Արեւմուտքը չի կարող մշտապես բանակցություններ եւ ձիթենու ճյուղ առաջարկել Մոսկվային, եւ սահմանել լայնածավալ տնտեսական պատժամիջոցներ Ուկրաինայի շուրջ լարվածության աճի դեպքում: Այդ մասին հայտարարել է Եվրոպական խորհրդի նախագահ Շառլ Միշելը կիրակի Մյունխենի անվտանգության համաժողովին ելույթ ունենալիս, հաղորդում է ՏԱՍՍ-ը:

«Ուկրաինայի շուրջ ռուսական ուժերի կենտրոնացումը շարունակվում է, մենք չենք տեսնում ապաէսկալացիայի նշաններ»,-պնդել է նա: «Մենք չենք կարող հավերժ առաջարկել ձիթենու ճյուղ. եթե էսկալացիան շարունակվի, կսահմանվեն լայնածավալ պատժամիջոցներ»,-խոստացել է Միշելը: 

Նա նաեւ կարծիք է հայտնել, որ Ռուսաստանը փորձել է պառակտել Արեւմուտքը, սակայն նպաստել է հակառակ արդյունքին՝ համախմբելով Եվրամիության երկրներին, տրանսատլանտյան դաշնակիցներին ԱՄՆ-ին ու Կանադային եւ ամբողջ աշխարհում գործընկերներին, այդ թվում՝ Ճապոնիային:

Նրա խոսքով՝ ԵՄ-ն տնտեսական առաջարկներ է ներկայացրել Աֆրիկային, որոնք պետք է ավելի գրավիչ լինեն, քան ՌԴ-ի ու Չինաստանի նախաձեռնությունները: