Արցախի նախագահի մամուլի քարտուղարը պարզաբանել է Արայիկ Հարությունյանի մոտալուտ հրաժարականի մասին շրջանառվող լուրերը
Այսօր մամուլում տեղեկություններ տարածվեցին, թե Արցախում քաղաքական վերադասավորումների ակտիվ փուլ է սկսվել: Գործող նախագահ Արայիկ Հարությունյանն օրեր առաջ հեռանալու պատրաստակամություն է հայտնել, և քաղաքական դաշտը սկսել է պատրաստվել հաջորդ տարի նախատեսվող ընտրական գործընթացին: Անգամ շրջանառվում է որպես ընդդիմության թեկնածու պաշտպանության նախկին նախարար ԼյովաՄնացականյանի անունը:
Auroranews-ի հետ զրույցում Արցախի նախագահի մամուլի քարտուղար Լուսինե Ավանեսյանը պարզաբանել է մամուլում շրջանառվող այդ լուրերը։
«Անկախ նրանից, թե ինչ են գրում լրատվամիջոցները, պաշտոնից հեռանալու մասին նախագահ Հարությունյանը հետպատերազմյան շրջանում մի քանի անգամ հայտարարել է` նշելով, որ կգնա այդ քայլին, երբ Արցախում հնարավոր կլինի համապետական ընտրությունների անցկացումը։ Արցախում այսօր սահմանդրական բարեփոխումների մասին է ազդարարվել, որը մի շարք հարցերի պատասխան պիտի տա։ Մինչ այդ գործընթացի ավարտը մնացած բոլոր քննարկումների մեկնաբանությունից ձեռնպահ կմնամ»,–ասաց Ավանեսյանը։
