Զախարովան՝ 8 հայ ռազմագերիների վերադարձի մասին

ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է Ադրբեջանի կողմից  8 հայ ռազմագերիների վերադարձին: 

Նա նշել է, որ ՌԴ ԱԳՆ-ն ողջունում է 8 հայ ռազմագերիների վերադարձը, և հավելել. «Անշուշտ, մենք կարևոր ենք համարում զուգահեռաբար ջանքեր գործադրել հակամարտության ընթացքում անհետ կորածների ճակատագիրը պարզելու ուղղությամբ և կաջակցենք դրան ինչպես ազգային, այնպես էլ որպես ԵԱՀԿ Մինսկի խմբի համանախագահ երկիր»:

ԱԳՆ ներկայացուցիչը հիշեցրել է, որ 2020թ. դեկտեմբերի 2-ին ռուս խաղաղապահների միջնորդությամբ վերադարձվել է 146 մարդ, որոնցից 127-ը՝ հայկական կողմին և 19-ը՝ ադրբեջանական: Հիշեցնենք, որ 2021 թվականի նոյեմբերի 16-ին ադրբեջանական գերության մեջ հայտնված 8 հայ զինծառայողներ փետրվարի 7-ին Ֆրանսիայի նախագահ Էմանուել Մակրոնի և Եվրոպական խորհրդի նախագահ Շառլ Միշելի միջնորդությամբ վերադարձվել են Հայաստանին:

ՀՀ ԱԳՆ-ն հրապարակել է Հայաստան վերադարձած ռազմագերիների անունները: Նրանք են Սարգիս Տարզյանը, Վարդգես Բալայանը, Արմեն Պետրոսյանը, Արթուր Բաբայանը, Հմայակ Սարգսյանը, Գուրգեն Գալոյանը, Գրիգոր Կյուրեղյանը և Վաղարշակ Մալոյանը։