ԵՄ-ն ունի Ռուսաստանի դեմ պատժամիջոցների գործիքներ, բայց ավելի լավ է խուսափել դրանցից. Բորել
Եվրամիությունն ունի Ռուսաստանի համար ցավոտ պատժամիջոցներ կիրառելու գործիքներ, սակայն կնախընտրեր չկիրառել դրանք։ Այս մասին հայտարարել է եվրոպական դիվանագիտության ղեկավար Ժոզեպ Բորելը։
«Եվրամիությունը որոշակի գործիքներ ունի տնտեսության, առևտրի և ֆինանսների ոլորտում, որոնք կարող են օգտագործվել և լուրջ հետևանքներ կունենան Ռուսաստանի տնտեսության համար... Լավ կլինի, եթե դա տեղի չունենա»,- Բորելի խոսքերն է մեջբերում РИА Новости-ն։
Ըստ եվրոպական դիվանագիտության ղեկավարի՝ խոսքը ինչպես անձնական պատժամիջոցների, այնպես էլ ոլորտային ու ֆինանսական սահմանափակող միջոցների մասին է։ Նա ընդգծել է, որ այս դեպքում զսպումը դիվանագիտական բանակցությունների մի մասն է։
«Մեր պարտքն է խոսել այն մասին, թե ինչպիսին կլինեն Ուկրաինայի դեմ ագրեսիայի հետևանքները… Մենք դիվանագիտական ոլորտում կանենք հնարավոր ամեն ինչ դա կանխելու համար», - եզրափակել է Բորելը:
