Ռուսաստանը «նյարդերի պատերազմ» է վարում. Ժոզեպ Բորելը՝ ՌԴ-ի դեմ նոր պատժամիջոցների մասին
Եվրամիությունն աշխատում է Մոսկվայի դեմ նոր սահմանափակումների ուղղությամբ: Այս մասին հայտնել է ԵՄ արտաքին գործերի գերագույն ներկայացուցիչ Ժոզեպ Բորելը, գրում է Говорит Москва-ն։
«Ռուսաստանին զսպելու ջանքերի շրջանակում մենք առաջընթաց ենք գրանցել պատասխան միջոցառումների նախապատրաստման հարցում, որոնք լուրջ ծախսեր կառաջացնեն Ռուսաստանի տնտեսության և ֆինանսական համակարգի համար»,- նշել է նա:
Միաժամանակ Բորելը հայտարարել է, որ Եվրամիությունը ափսոսում է Ռուսաստանի որոշման համար, որի համաձայն՝ ընդլայնվում է ԵՄ այն ներկայացուցիչների ցուցակը, որոնց մուտքն արգելվում է ՌԴ։
«Այս որոշումը զուրկ է իրավական հիմնավորումից և թափանցիկությունից և կունենա համապատասխան արձագանք։ Այս որոշմամբ Ռուսաստանը շարունակում է լարվածության սրումը Եվրոպայում՝ դեէսկալացիայի խթանման փոխարեն»,- ընդգծել է նա։
Բորելի խոսքով՝ «Ռուսաստանը նյարդերի պատերազմ է վարում»։
