Սերժ Սարգսյանը պատրաստվու՞մ է կարևոր փաստաթղթեր հրապարակել․ մանրամասներ
Ինչպես հայտնի է, երրորդ նախագահ Սերժ Սարգսյանը հունվարի երկրորդ կեսին ասուլիս է հրավիրելու։ ArmDaily.am-ին հայտնի է դարձել, որ երրորդ նախագահը պատրաստվում է կարևոր փաստաթղթեր հրապարակել Արցախի շուրջ բանակցային գործընթացի վերաբերյալ։
Մասնավորապես, փաստաթղթերը վերաբերելու են Նիկոլ Փաշինյանի այն հայտարարությանը, թե բանակցային գործընթացում «աղետ» է գրանցվել, երբ Ղարաբաղը կորցրել է Ադրբեջանի կազմից դուրս լինելու գործնական և տեսական բոլոր հնարավորությունները։
Լրատվականը կապվել է ՀՀԿ ԳՄ անդամ Էդուարդ Շարմազանովի հետ, ով վերոնշյալ տեղեկությունները ոչ հերքել է, ոչ էլ հաստատել։ «Դա պարոն նախագահի մենաշնորհն է, որոշելիքն է՝ ինչ խոսել, ինչ ներկայացնել, կամ ներկայացնել, թե ոչ։ Պարոն նախագահը ինքը որոշել է, որ Արցախյան հիմնահարցի վերաբերյալ կխոսի, բանակցային փաթեթի մասին մանրամասներ կհաղորդի։ Կգա ժամանակը, կհետևեք և կիմանաք- ասել է Շարմազանովը։
Ինչ վերաբերում է ասուլիսի օրվան՝ Շարմազանովն ասել է, որ այն հաղորդագրությամբ կհայտարարվի։
