Նախկին նախարար Արամ Հարությունյանի ապօրինի հարստացման գործն էլ է դատարան ուղարկվել

Բնապահպանության նախկին նախարար Արամ Հարությունյանի ապօրինի հարստացման գործը ուղարկվել է դատարան: «Դատալեքս» դատական-տեղեկատվական համակարգից տեղեկացանք, որ գործը մակագրվել է Երևան քաղաքի ընդհանուր իրավասության դատարանի դատավոր Հովիկ Շահնազարյանին։

Հիշյալ գործով անցնում են նախկին նախարար Արամ Հարությունյանը, վերջինիս կինը՝ Հասմիկ Աբգարյանը և նրանց ընտանիքի հետ փոխկապակցված Արշակ Ջավադյանը: Գլխավոր դատախազությունը պահանջում է հօգուտ պետության բռնագանձում իրականացնել: Նշենք, սակայն, որ հստակ նշված չէ,  թե ինչ գումարի մասին է խոսքը։ 

Հավելենք նաև, որ սա ապօրինի ծագմամբ գույքի բռնագանձման մասին դատարան ուղարկված արդեն երրորդ գործն է: Նախորդ երկու գործերը եղել են ՀՀ նախկին ոստիկանապետ Վլադիմիր Գասպարյանի և իր ընտանիքի, ինչպես նաև Ազգային անվտանգության ծառայության նախկին պաշտոնյա Սերոբ Հարությունյանի գործերը։