Վահագն Ալեքսանյանը և Արուսյակ Մանավազյանը ներկա են գտնվել Փարաքարի ավագանու նիստին

 ՔՊ-ական պատգամավորներ Վահագն Ալեքսանյանը եւ Արուսյակ Մանավասյանը ՔՊ ավագանու անդամների հրավերով ժամանել են Փարաքարի ավագանու նիստին: 

«Ես չեմ կարծում, որ այստեղ անհանգստացնող ինչ-որ բան կա կամ  կարող է լինի, որովհետեւ ՔՊ խմբակցությունը եւ «Դավիթ ՄԻնասյան» դաշինք խմբակցությունները ունեն համապատասխան թվով քվեներ, որ կատարեն իրավազոր  նիստը եւ իրավազոր ընտրություն կատարեն: Կարծումեմ բոլոր խնդիրները տեխնիկական են եւ շատ շուտով բոլոր խնդիրները կլուծվեն»,-ասաց ԱԺ «Քաղաքացիական պայմանագիր» կուսակցության պատգամավոր Վահագն Ալեքսանյանը:

Նշենք, որ առավոտից խմբակցություններին չի հաջողվում նիստ անցկացնել:

Հիշեցնենք, որ դեկտեմբերի 5-ին կայացած ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել է 10 մանդատ եւ 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Թեեւ 10 ձայնը 50 տոկոսից քիչ է, սակայն «Ապրելու երկիր» կուսակցությունը պնդում է, որ եթե առաջադրված է մեկ թեկնածու, ապա նա կարող է ընտրվել 40+ տոկոս ձայներով:
Դրանից հետո եկել էին ավագանու մնացած 11 անդամները եւ 11 ձայնով համայնքապետ էր ընտրվել Դավիթ Մինասյանը, որը «Դավիթ Մինասյան» դաշինքի թեկնածուն է: Նրան էին ընտրել նաեւ ՔՊ-ի անդամները:

Դեկտեմբերի 23-ին «Ապրելու երկիր» կուսակցության աջակիցները հավաքվել էին Փարաքարի մշակույթի տան բակում, որտեղ պետք է տեղի ունենար իրենց թեկնածուի երդմնակալությունը, սակայն ոստիկանները նրանց թույլ չէին տվել մտնել շենք, և երդմնակալությունը դրսում էր կազմակերպվել:
Նույն օրն էլ «Դավիթ Մինասյան» դաշինքը դատարան հայց էր ներկայացրել՝ ընտրությունների արդյունքները անվավեր ճանաչելու պահանջով: Վարչական դատարանը որոշում է կայացրել անվավեր ճանաչել Փարաքար համայնքի ղեկավարի ընտրությունների արդյունքները։