«Ալեն Սիմոնյանը կհրավիրվի դատարան». Արծվիկ Մինասյան

ԱԺ նախագահ Ալեն Սիմոնյանն առաջիկա օրերին կհրավիրվի դատարան։ Այս մասին այսօր ԱԺ–ում լրագրողների հետ զրույցում հայտնեց «Հայաստան» խմբակցության պատգամավոր Արծվիկ Մինասյանը` ներկայացնելով խորհրդարանում դեռևս 2021թ–ի օգոստոսին տեղի ունեցած ծեծկռտուքի գործով քննության ընթացքը։

«Մենք պահանջել ենք, որ դատարան հրավիրվեն Ալեն Սիմոնյանը, ինչպես նաև անվտանգության ծառայության պետը, և դատարանը բավարարել է մեր պահանջը։ Առաջիկայում նաև նշանակված է այս հարցով դատական նիստը։ Այնպես չէ, որ մենք հետևողական չենք»,– ասաց Մինասյանը` 4 ամիս առաջ տեղի ունեցած դեպքը համեմատելով դեկտեմբերի 7-ին ԱԺ ընդդիմադիր պատգամավորների օգնականների ու իշխանամետ պատգամավորների միջև տեղի ունեցած ծեծկռտուքի հետ։

«Դրան գումարած` ես նաև հաղորդում եմ ներկայացրել Անդրանիկ Քոչարյանի, Վահագն Ալեքսանյանի վերաբերյալ։ Ես կոնկրետ չեմ նահանջում ու համարում եմ, որ իրավական պատասխանատվությւնը պետք է վրա հասնի։ Վաղ թե ուշ դա վրա է հասնելու, ու այս մարդիկ պատասխան տալու են, ինչքան էլ փորձեն հանրության ուշադրությունը շեղել»,– ասաց Մինասյանը։

Հիշեցնենք` դեկտեմբերի 7-ին Ազգային ժողովում ծեծկռտուք էր տեղի ունեցել։ Ինչպես լրագրողներին պատմել էր ԱԺ փոխնախագահ, «Հայաստան» խմբակցության անդամ Իշխան Սաղաթելյանի օգնական Սյունե Գևորգյանը, ծեծկռտուքը տեղի է ունեցել ԱԺ փոխնախագահ Ռուբեն Ռուբինյանի աշխատասենյակում։ Դրան, ըստ Գևորգյանի, մասնակցել են ՔՊ–ականներ Հրաչյա Հակոբյանը, Վահագն Ալեքսանյանը, Սիսակ Գաբրիելյանը։