Թբիլիսին Երևանին և Բաքվին առաջարկել է Անդրկովկասում խաղաղության հասնելու իր տարբերակը
Պաշտոնական Թբիլիսին Երևանին և Բաքվին առաջարկել է տարածաշրջանում տևական խաղաղության հասնելու հարցում բանակցությունների սեփական ձևաչափը:
Ինչպես խորհրդարանում հայտնել է Վրաստանի փոխվարչապետ, արտաքին գործերի նախարար Դավիթ Զալկալիանին՝ Թբիլիսին հանդես է գալիս երկրների՝ «եռյակի» շրջանակում բանակցությունների ձևաչափ ստեղծելու նախաձեռնությամբ, որում Վրաստանը, Ադրբեջանը և Հայաստանը կբանակցեն Անդրկովկասում երկարաժամկետ խաղաղություն հաստատելու համար։
«Մեր այլընտրանքն այն նախաձեռնություններն են, որոնք մենք առաջարկում ենք, այդ թվում՝ եռյակի ձևաչափը՝ Հարավային Կովկասի երեք երկրները: Դրան կմասնակցեն Վրաստանը, Ադրբեջանը և Հայաստանը: Թբիլիսին պետք է հարթակ դառնա հարավկովկասյան երեք երկրների միջև երկխոսության համար»,- ասել է Զալկալիանին։
Ըստ նրա, Թբիլիսին հավակնություններ ունի առաջարկելու հարևան երկրներին մասնակցել տնտեսական նախագծերին, որոնք կնպաստեն տարածաշրջանում լարվածության թուլացմանը և երկարաժամկետ հեռանկարում խաղաղության հաստատմանը:
Զալկալիանին ասել է, որ Վրաստանը չի նախատեսում մասնակցել «3+3» բանակցային ձևաչափին (Ադրբեջան, Հայաստան, Վրաստան - Ռուսաստան, Թուրքիա, Իրան)՝ Կովկասում տնտեսական և տրանսպորտային կապերի բացման խնդրի շուրջ։
