Թշնամին նորից հետ է քաշվել. ինչ իրավիճակ է Անգեղակոթում և Իշխանասարում. ArmDaily

Կյանքն իր հունով գնում է, մարդիկ իրենց առօրյա գործերով են զբաղված, դպրոցն աշխատում է և անգամ ռազմական բախումների օրն է դպրոցն աշխատել։ Այս մասին ArmDaily.am-ի հետ զրույցում ասել է Սյունիքի մարզի Սիսիանի Իշխանասար բնակավայրի վարչական ղեկավար Մարատ Պետրոսյանը։

«Հիմա հանգիստ է ամեն ինչ, մտահոգիչ ոչինչ չկա։ Թշնամին նորից հետ է քաշվել, մենք հետ ենք վերցրել մեր դիրքերը։ Մեր գյուղն անմիջապես մեր դիրքերի մոտ է տեղակայված»,- ասել է Պետրոսյանը։

Նա նշել է, որ զինվորները սարի պես կանգնած են իրենց առջև ու իրենք իրենց պաշտպանված են զգում։

«Համայնքն է այսօր զինվորին նայում, զինվորն էլ համայնքին է նայում։ Մեր զինվորն այստեղ էնպես է նստած, որ պատկան մարմիններն էլ պետք չեն։ Մենք իրենց ենք օգնում՝ իրենք էլ մեզ, մեռնեմ իրենց կյանքին»,-ասել է Պետրոսյանը։

Բնակավայրի ղեկավարն ասել է, որ տրանսպորտի խնդիրներ չունեն ոչ իրենք, ոչ զինվորները և որ կապը Սիսիանի հետ անխափան գործում է, Սիսիանը բնակավայրից ընդամենը 6 կիլոմետր է հեռու։ Սիսիանի Անգեղակոթ բնակավայրի ղեկավար Արմենակ Մարկոսյանը ևս նշել է, որ իրենց բնակավայրում ամեն ինչ հանգիստ է, մարդիկ իրենց առօրյա գործերով են զբաղված։

«Իրավիճակը գյուղում թե պատերազմի օրերին, թե ընդհանրապես միշտ էլ նորմալ է եղել, կայուն, խուճապ ընդհանրապես չկա, դպրոցը գործում է, մանկապարտեզը գործում է, այսինքն առօրյա կյանքով ապրում ենք»,-ասել է Մարկոսյանը։