Այս հայտարարությունները ոչ միայն վտանգավոր են, այլև խիստ վնասակար հենց Հայաստանի համար. Լևոն Բարսեղյան
| «Ասպարեզ» մամուլի ակումբի նախագահ Լևոն Բարսեղյանը գրում է. «ՀՀ ԱԽ քարտուղարի ու պատգամավորներից մի քանիսի բերանով Ռուսաստանին համարյա վերջնագրային տեքստեր էին ասվում, լսեցիք հավանաբար: Մոտավորապես այս էր՝ հատարի՛ր 1997 թ. դաշնակցի պարտավորություններդ ՀՀ տարածքային ամբողջականության պահպանման գծով, թե չէ, մենք ուրիշի հետ կդաշնակցենք: Բառացի այդպես չասվեց, բայց իմաստն այդ էր՝ անելո՞ւ ես, թե չէ ուրիշին ասենք, գա մեզ փրկի: Առանձին քննարկելիք է, թե երբ և ինչու մի պետությունը (կայսրության կորսված տարածքները վերականգնել կամեցող) պիտի հավես ունենա պաշտպանել մեկ այլ պետության տարածքային ամբողջականությունը: Այստեղ հարց կա, թե նման քաղաքական ուղերձից առաջ ինչ նախապատրաստություններ են արվել (1) նույն Ռուսաստանի և (2) մյուսների հետ: Գուցե արվել են, գուցե ոչ, տեղյակ չեմ: Բայց եթե չեն արվել, այս հայտարարությունները ոչ միայն վտանգավոր են, այլև խիստ վնասակար հենց Հայաստանի համար: Ընդհանրապես, կարծում եմ նման հայտարարություններ անելու փաստն ինքնին խոսում է «ռազմավարական դաշնակցի» հետ նախապատրաստական աշխատանք տարած չլինելու մասին, մանավանդ, պարզվեց ժամը 6-ից մի քանի րոպե պակաս, Հայաստանը դեռևս գրավոր չէր դիմել Ռուսաստանին: Ինչ մի մեծ պատմություն էր, թեկուզ պայմանագրի գործել-չգործելն ստուգելու համար գրավոր դիմել, հետո միայն հայտարարել»: |
