Ադրբեջանի ՊՆ-ն նշում է, թե ընդամենը 7 զոհ ունեն, իսկ ոչ պաշտոնական աղբյուրներն այլ թվեր են ներկայացնում
Ադրբեջանի պաշտպանության նախարարությունը հայտարարություն է տարածել, որում նշվում է, թե երեկ Հայաստանի Հանրապետության դեմ իրականացված ագրեսիայի արդյունքում ընդամենը 7 ադրբեջանցի զինծառայող է զոհվել, 10-ը՝ վիրավորվել։
Նշենք, որ ավելի վաղ ՀՀ պաշտպանության նախարարությունը նշել էր, որ ադրբեջանական կողմն ունի մինչև 70 զոհված և վիրավոր զինծառայող, ինչպես նաև զինտեխնիկայի զգալի կորուստներ, մասնավորապես՝ 4 БТР զրահափոխադրիչ, 1 Sandcat զրահամեքենա, 5 ավտոմոբիլային միջոց (Камаз, Урал, УАЗ)։
Ադրբեջանը շարունակում է 44 օրյա պատերազմի ժամանակ որդեգրած քաղաքականությունն ու հերթական անգամ կեղծում կորուստների ու վիրավորների թիվը:
Ավելի վաղ ադրբեջանական թելեգրամյան ալիքները ևս այլ տվյալներ էին հայտնել, որոնք նույնպես հակասում են Բաքվից հնչած պաշտոնական ստին:
