Հնարավոր էր այս հարցի շուրջ բանակցել, բայց գինը լինելու էր միջանցքային տրամաբանությունը. Փաշինյան

Այսօր ՀՀ կառավարության հերթական նիստի ժամանակ վարչապետ Նիկոլ Փաշինյանը հիշեցրեց, որ դեռևս այս տարվա օգոստոսին Ադրբեջանը Գորիս-Կապան ավտոճանապարհի՝ իրեն պատկանող հատվածում Իրանի Իսլամական Հանրապետության բեռնատարների նկատմամբ մաքսային վարչարարություն էր ներկայացնում:

«Երեկ Ադրբեջանից ոչ պաշտոնական ծանուցում ենք ստացել, որ նոյեմբերի լույս 11-ի գիշերվանից նրանք պատրաստվում են մաքսային և անձնագրային հսկողություն իրականացնել նաև ՀՀ քաղաքացիների և բեռների նկատմամբ: Ծանուցումը ստանալուց հետո մենք որոշում ենք կայացրել այդ հատվածով երթևեկող քաղաքացիներին ուղղորդել դեպի Կապան-Աղավնի-Տաթև-Հալիձոր-Շինուհայր Մ2 ավտոճանապարհ»:

Փաշինյանը տեղեկացրեց՝ Տաթև-Աղավնի ճանապարհն ասֆալտապատվել է և շահագործման հանձնվել նախորդ շաբաթ. «Նախորդ հինգշաբթի ես այդ ճանապարհով գնացել եմ Կապան և վերադարձել: Կարող եմ վկայել՝ ստացել ենք որակով ճանապարհ»:

Վարչապետի խոսքով՝ Կապան մեկնելիս և վերադառնալիս այդ ճանապարհին տեսել է մի քանի տասնյակ կցորդիչով բեռնատարներ, այդ թվում՝ իրանական։

«Երեկ մինչև կեսգիշեր և դրանից հետո Կապան-Տաթև հատվածով անցել է շուրջ 100 կցորդիչով բեռնատար»,- ասաց վարչապետը։

Վարչապետն ընդգծեց՝ նոր երթուղիով դեպի Կապան և հակառակ ուղղությամբ երթևեկության ժամկետը չի ավելանում, կրճատվում է՝ հաշվի առնելով ճանապարհի որակը:

Նիկոլ Փաշինյանը շեշտեց՝ Ադրբեջանական անցակետը չի գտնվում ՀՀ տարածքում. «Խոսքը Էյվազլիի տարածքի մասին է: Հիմա կարող է հարց առաջանալ՝ հնարավոր չէ՞ր բանակցություններ վարել այս հարցի շուրջ: Այո, հնարավոր էր, բայց դրա գինը լինելու էր միջանցքային տրամաբանությունը, ինչը մեզ համար անընդունելի է»:

Կառավարության ղեկավարը ևս մեկ անգամ հավաստիացրեց, թե երբևէ չեն քննարկել ու չեն քննարկելու որևէ միջանցքային տրամաբանություն, ինչն արձանագրված է փոխվարչապետների եռակողմ ձևաչափում։

«Վերջին շաբաթներին այս տրամաբանությունը և պայմանավորվածությունը հրապարակային կերպով հաստատել է նաև ՌԴ-ն։ Հենց այդ համատեքստում է Ադրբեջանը կայացրել երեկվա որոշումը։ Հայաստանը շարունակում է հավատարիմ մնալ նոյեմբերի 9-ի և հունվարի 11-ի հայտարարությունների դրույթներին, մասնավորապես՝ տարածաշրջանի բոլոր տրանսպորտային և տնտեսական կոմունիկացիաներն ապաշրջափակելու մասով։ Շահագրգռված ենք տարածաշրջանի բոլոր տնտեսական և տրանսպորտային կոմունիկացիաներն ապաշրջափակելու հարցում և հույս ունենք առաջիկայում հասնել կոնկրետ լուծումների»,- ասաց Նիկոլ Փաշինյանը։

Նա տեղեկացրեց, որ Հայաստանը նույնպես կտեղադրի անցակետեր. «Այս չափազանց կարևոր ժամանակահատվածում մեզ համար կարևոր է պահպանել սառնասրտություն, ունենալ ամուր նյարդեր»,- նշեց Փաշինյանը: