ԵՊՀ-ն ՔՊ-ականացնում են․ Մենուա Սողոմոնյան
«Սա հերթական արարն է, հերթական քայլն է՝ այդ տխրահռչակ քաղաքական ուժի ինքնավերատադրությունը ապահովելու համար»,- News.am-ի հետ զրույցում ասել է ԵՊՀ դասախոս Մենուա Սողոմոնյանը` անդրադառնալով ԵՊՀ հոգաբարձուների խորհրդի նախագահի ընտրություններին և մայր ԲՈՒՀ-ում իրականացվող փոփոխություններին։
«Եթե իրենք նախկինում այն հանգամանքից ելնելով, որ Սերժ Սարգսյանը համալսարանի հոգաբարձուների խորհրդի նախագահն էր, ասում էին, որ համալսարանը «հանրապետականացնում» են, հիմա ես ասում եմ` դուք էլ համալսարանը ՔՊ-ականացնում եք` թքելով բոլոր օրենքների, բոլոր կանոնների, անգամ Սահմանադրության վրա, որովհետև այս ամբողջ գործընթացն ապօրինի է եղել: Ապօրինի է եղել այն պատճառով, որ գործող իշխանությունների կողմից մեծ մասնակցություն ունենալը համալսարանի կառավարման մարմինների ստեղծման գործում, այդ դրույթները, որոնք դուք զետեղել էիք բարձրագույն կրթության և գիտության մեջ և դրա հիմքով հակասահմանադրական էր ճանաչվել, դուք շարունակեցիք այդ նույն գործելակերպը և միակողմանիորեն կառավարությունը կատարեց համալսարանի կանոնադրության մեջ փոփոխություններ` այդ թվում վերացնելով պրոֆեսորի կոչումի պահանջը՝ ռեկտորի պաշտոնի համար: Այս փոփոխությունը տեղի ունեցավ միանձնյա, այսինքն՝ ԲՈՒՀ-ի ինքնավարության սկզբունք կոպտագույնս խախտվեց»,- ասել է նա:
Սողոմոնյանի խոսքով՝ ռեկտոր է նշանակվել քաղաքական ուժի ներկայացուցիչ, նրա հովանու ներքո էլ իրականացվել է ԵՊՀ հոգաբարձուների խորհրդի կազմավորման գործընթացը:
«Մի շատ կարևոր բան հաշվի չեն առել․ որ ես հայց էի ներկայացրել և՛ քաղաքացիական, և՛ վարչական դատարան: Քաղաքացիական և վարչական դատարանները մերժեցին վարույթ ընդունել և արգելանք դնել այդ որոշումների վրա, մենք բողոքարկեցինք Վերաքննիչ դատարան, որը բավարարեց մեր հայցը»,- ասել է Սողոմոնյանը՝ շեշտելով, որ այսօր կայացած նիստը ապօրինի է:
Հիշեցնենք՝ այսօր ԵՊՀ հոգաբարձուների խորհրդի նախագահի պաշտոնում ընտրվել է ՀՀ փոխվարչապետ Սուրեն Պապիկյանը։
ԵՊՀ դասախոս Մենուա Սողոմոնյանը նիստի ընթացքում հայտարարություն էր տարածել՝ նշելով, որ նիստն ապօրինի է։ Նա Հովհաննես Հովհաննիսյանի պաշտոնավարումը, որպես ռեկտորի ժամանակավոր պաշտոնակատար, նույնպես անօրինական էր համարել։
