Նոյեմբերի 9-ից հետո Հայաստանը բազմաթիվ վիրավորներ ու զոհեր է ունեցել. Նիկոլ Փաշինյան

Մենք պետք է խոստովանենք, որ ըստ էության ձախողել ենք բանակաշինության գործն այն առումով, որ բանակը պետք է համապատասխաներ այն մարտահրավերներին, որոնք առկա են Հայաստանի Հանրապետության շուրջ:  Այս մասին Հանրայինի եթերում ասել է վարչապետ Նիկոլ Փաշինյանը։
 

«Այս ամենը նաև արտահայտվել է կոնկրետ տեղամասերում, կոնկրետ բնագծերում, կոնկրետ երևույթներով և դրսևորումներով։ Օրինակ, կուզեի նշել պահեստազորի հետ տարվող աշխատանքները։ Երկար տարիներ Հայաստանում պահեստազորի զորահավաքներ պատշաճ ձևով և մակարդակով տեղի չեն ունեցել», - ասել է նա:

Փաշինյանը հայտարարել է, որ  Հայաստանը բարձր է գնահատում Լեռնային Ղարաբաղում տեղակայված ռուս խաղաղապահների գործունեությունը:

«Նրանք այսօր Լեռնային Ղարաբաղում անվտանգության ապահովման առանցքային դերակատարներից են ու սա պետք է արձանագրել», - ասել է նա և շարունակել, որ  կրակի դադարեցման ռեժիմն ամբողջությամբ չի պահպանվում ու սա արձանագրել են նաև խաղաղապահները:
 

Նա նշել է, որ  նոյեմբերի 9-ից հետո Հայաստանը բազմաթիվ վիրավորներ ու զոհեր է ունեցել. «Շուրջ 28 զոհ ենք ունեցել, մասնավորապես, Խծաբերդ-Հին թաղեր հատվածում տեղի ունեցած միջադեպի զոհերը, նաև հայ-ադրբեջանական սահմանի երկայնքով տեղի են ունեցել միջադեպեր, զոհեր ենք ունեցել ու սա, իհարկե, շատ անհանգստացնող փաստ է, պիտի ասեմ՝ ռազմական գործողությունների դեպքեր նույնպես ունեցել ենք»:
 

Փաշինյանի խոսքով՝ հաստատված 40 գերիների մեծ մասը՝ 90 տոկոսը, գերեվարվել է նոյեմբերի 9-ի հայտարարությունից հետո ու մինչև այժմ ազատ չի արձակվել: Նա ասել է, որ Ադրբեջանը որդեգրել է ռուս խաղաղապահների գործունեությունը վարկաբեկելու ուղեգիծ: