«Մենք մի քանի հարյուր գերի չենք ունեցել, չունենք, մի քանի հարյուր հաստատ չէ»․ Վահե Ղալումյան
Գորիս-Կապան ճանապարհահատվածում ադրբեջանական ոստիկանական կետը Հայաստանի Հանրապետության տարածքում չէ, այսօր Ազգային ժողովում լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Վահե Ղալումյանը։
Լրագրողները հետաքրքրվեցին` այդ դեպքում որտե՞ղ է գտնվում, իշխանական պատգամավորն էլ արձագանքեց. «Ո՞նց որտեղ է գտնվում... էդ ճանապարհը, նորից եմ կրկնում, մի քանի տեղ անցնում է ադրբեջանական տարածքով»։
Անդրադառնալով ՀՀ երկրորդ նախագահ Ռոբերտ Քոչարյանի ասածին, որը նշել էր, թե «չոքած վիճակում հարմար չէ բանակցել», Ղալումյանը նշեց. «Էդ Ռոբերտ Քոչարյանի կարծիքն է, չեմ կիսում ես էդ կարծիքը։ Այո, պարտված ենք համարում ինչպես իշխանությանը, այնպես էլ ընդդիմությանը, ամբողջ պետությանը»։
Պատգամավորն ասաց, թե, այո, կարելի է մարդասիրական մղումներից ելնելով՝ քարտեզները հանձնել Ադրբեջանին, փոխարենը ստանալ բոլոր գերիներին։
«Մենք մի քանի հարյուր գերի չենք ունեցել, չունենք, մենք գերիներ ունենք, թիվը չգիտեմ, մի քանի հարյուր հաստատ չէ», - ասաց նա։
Ղալումյանը վստահեցրեց, թե Գորիս-Կապան ճանապարհով երթևեկելիս իրեն անվտանգ է զգացել։
«Սահմանային խնդիրներ միշտ էլ եղել են, եթե սահմանագծում-սահմանազատում չլինի, խնդիրները լինելու են», - ասաց նա։
