Նոր մանրամասներ Երևանում տեղի ունեցած ողբերգական ավտովթարից. պարզվել է մահացածի և վիրավորների ինքնությունը

Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի հատկապես կարևոր գործերով ավագ քննիչ  Մանվել Մուրադյանի որոշմամբ ՀՀ քր. օր.-ի  242 հոդվածի 2-րդ մասի հատկանիշներով հարուցված քրեական գործի շրջանակում պարզվել է սեպտեմբերի 2-ին Երևանում ողբերգական ավտովթարի հետևանքով Mercedes- ներից մեկի մահացած վարորդի, մյուս Mercedes-ի վարորդի և վիրավորների ինքնությունը: 

Ինչպես հայտնում է shamshyan.com-ը, պարզվել է՝ Mercedes մակնիշի 35 TG 968 համարանիշի ավտոմեքենան վարել է Լոռու մարզի Լեռնապատ գյուղում հաշվառված, 27-ամյա  Էրիկ Ավետիսյանը, իսկ Mercedes մակնիշի  34 FZ 900 համարանիշի ավտոմեքենան վարել է Երևան քաղաքում հաշվառված, 28-ամյա Սերգեյ Գասպարյանը: Վթարի  հետևանքով Է. Ավետիսյանը տեղում մահացել է, իսկ Ա. Գասպարյանն ու նրա ուղևոր, Երևանի բնակիչ, 34-ամյա Նարեկ Էվոյանը մարմնական վնասվածքներով տեղափոխվել են «Էրեբունի» բժշկական կենտրոն,  որտեղից Ս. Գասպարյանը տեղափոխվել է «Արմենիա» բժշկական կենտրոն: 

Ինչպես ավելի վաղ դեպքի վայրից հայտնել էր ֆոտոլրագրողը,սեպտեմբերի 2-ին ողբերգական  ավտովթար էր տեղի ունեցել Երևանում: Ժամը 00:40-ի սահմաններում Ծիծեռնակաբերդի խճուղում ճակատ-ճակատի բախվել են 2 Mercedes մակնիշի ավտոմեքենաներ։ Բախման հետևանքով 1 հոգի տեղում մահացել էր, 1 հոգի տեղափոխվել էր հիվանդանոց։ Օպերատիվորեն ժամանել էին Արտակարգ իրավիճակների նախարարության Փրկարար ծառայության Երևանի թիվ 7 հրշեջ-փրկարարական ջոկատի փրկարարները՝ 1 մարտական հաշվարկով: Մահացածին ավտոմեքենայից դուրս էին բերել փրկարարները՝ օգտագործելով հատուկ տեխնիկա։