«Կախարդական փայտիկը» գործում է, կանխատեսվում է տնտեսական աճ և գների էական անկում․ Քերոբյան

Էկոնոմիկայի նախարար Վահան Քերոբյանը վստահ է, որ այս տարվա ընթացքում Հայաստանում կարձանագրվի երկնիշ տնտեսական աճ։

Այդ մասին Քերոբյանը նշեց կառավարության նիստից հետո լրագրողների հետ զրույցում:

«Դեկտեմբեր ամսին բոլոր կանխատեսումներն ասում էին, որ Հայաստանը 2021 թվականին կունենա 1-1,5 տոկոս տնտեսական աճ, արդյունքում, մենք ունենք հինգ տոկոս տնտեսական աճ ու ամեն ինչ գնում է նրան, որ մենք ունենանք 10-ից ավելի տոկոս տնտեսական աճ։ Տնտեսության այդպիսի անդրադարձը խորը ճգնաժամից արդյունքն է նաև նրա, որ «կախարդական փայտիկը» գործում է», - ասաց Քերոբյանը՝ համոզմունք հայտնելով, որ տնտեսությունն արյունաքամ չի լինելու։

Լրագրողները հետաքրքրվեցին, թե գրանցված գնա՞ճն էլ կախարդական փայտիկի զորությամբ է եղել` Քերոբյանը նշեց, որ օգոստոսից սկսվում է հիմնական ապրանքների, նոր բերքի մասին տեղեկություններ հայտնելը, և վստահ է` գների էական անկում կտեսնենք։