Կարող եմ պատմել, թե ինչ են արել նախկինները․ Անդրեասյանը՝ խոստացված վենդետաների մասին

Արդարադատության նորանշանակ նախարար Կարեն Անդրեասյանը լրագրողներին հավատացրեց, որ կարող է պատմել, թե ինչ են արել նախկինները՝ իրավական և ոչ իրավական ուղղություններով, բայց չի ցանկանում խոսել անցյալի մասին։ Առաջարկում է՝ նախկինների մասին խոսելու փոխարեն կենտրոնանալ ապագայի վրա։ Հիմա ցանկանում է տեսնել կոնկրետ իրավական գործողություններ՝ բոլոր հանցագործներին իրավունքի սահմաններում պատժելու ուղղությամբ։

Ինչ վերաբերում է քարոզարշավի ընթացքում վարչապետ Նիկոլ Փաշինյանի խոստացած «վենդետաներ լինելու են» հարցին, Անդրեասյանը նշեց՝ թե ժողովրդի պահանջն է, որ հանցագործները պատժվեն։

«Հանցագործների, բոլոր իրավախախտների հանդեպ խիստ վերաբերմունք և օրենքի պատասխանատու, պատժիչ արձագանք սպասվում է, դա խոստացվել է, դա ժողովրդի հենց պահանջն է, ես իմ կարողությունները ներդնելու եմ հենց հանցագործների և ապօրինությունների դեմ պայքարին»,- ասաց Անդրեասյանը։

Լրագրողները խնդրեցին արդարադատության նախարարին իրավական գնահատական ու մեկնաբանություն տալ քարոզարշավի ընթացքում Փաշինյանի «մուրճ ճոճելուն»։

«Քաղաքական բանավեճի մեջ կարող են լինել այլաբանություններ, սիմվոլներ, որոշակի նույնիսկ՝ չափազանցություններ»,- ասաց նախարարը։