Արտաշես Պետրոսյանը առանց պաշտոն չի մնա

Իմքայլական պատգամավոր Արտաշես Պետրոսյանը, որն արտահերթ խորհրդարանական ընտրություններին ՔՊ ցուցակում չի ընդգրկվել, օգոստոսի 2-ից հետո՝ առաջիկա շաբաթվա ընթացքում նոր պաշտոն կստանա։ Այս մասին «Հրապարակ»ը տեղեկացել է կառավարությանը մոտ կանգնած աղբյուրներից։ 

Լրատվամիջոցը նշում է, որ Պետրոսյանը կնշանակվի Չինաստանում Հայաստանի առևտրային ներկայացուցչի պաշտոնում, այլ կերպ ասած՝ առևտրային կցորդ։

Հիշեցնենք, որ Պետրոսյանից առաջ այդ պաշտոնը զբաղեցնում էր Իմքայլական Վարազդատ Կարապետյանը, որն այդ պաշտոնից հրաժարական ներկայացրեց 2021 թվականի փետրվարի 16-ին։ Արտաշես Պետրոսյանը «Առաքելություն» կուսակցությունից է, մեզ ասացին, որ նրան վաղուց են խոստացել այս պաշտոնը, այդ պատճառով էլ նա ՔՊ ցուցակում չի ներառվել, նոր պաշտոնը Պետրոսյանի սրտով է։ 

Տեղեկությունը ճշտելու համար լրատվականը կապ է հաստատել Պետրոսյանի օգնական Արիս Դադյանի հետ, վերջինս չի հերքել տեղեկությունը՝ ասելով, որ Պետրոսյանը դեռևս պատգամավոր է, և եթե նոր պաշտոն ստանա, ապա այդ մասին կտեղեկացնի։ Արտաշես Պետրոսյանը 2008-2009թթ. աշխատել է «ԷԼԼԻՊՍ ՋԻ ԷՅ» ՍՊԸ-ում որպես ճարտարագետ: 2009-2011թթ.՝ «ՍՈՆԱԳՐՈ» ՓԲԸ-ում հաշվապահ: 2016-2019թթ.՝ «Արտ Գլոբալ» ՍՊԸ փոխտնօրեն: 2011 թվականից զբաղվում է ձեռնարկատիրական գործունեությամբ, Արտաշես Պետրոսյանին է պատկանում մեկանգամյա օգտագործման բաժակների արտադրությամբ զբաղվող «Էկո Փեյփր» ընկերությունը։