Բերման են ենթարկել ԶՊՄԿ-ի անվտանգության դեպարտամենտի ղեկավար Արամ Գասպարյանին
ԱԱԾ աշխատակիցներն այսօր՝ հուլիսի 14-ին, բերման են ենթարկել Զանգեզուրի պղնձամոլիբդենային կոմբինատի անվտանգության դեպարտամենտի ղեկավար Արամ Գասպարյանին:
Վերջինս բերման ենթարկելու ժամանակ լրագրողներին ասաց, որ չգիտի, թե ինչու են իրեն բերման ենթարկում. «Դե ինչ ասեմ, ինձ համար ԱԱԾ-ի առաջվա կոլեգաներս են, երեւի կարոտել են, տանում են»:
Նրա հետ միասին բերման ենթարկեցին նաեւ կոմբինատի մեկ այլ աշխատակցի, որը նշեց, որ ինքը նաեւ Կապան համայնքի ավագանու անդամ է եւ ինքն էլ չգիտի, թե ինչու են տանում:
Այս առնչությամբ «Վերածնվող Հայաստան» կուսակցության մամուլի պատասխանատու Վազգեն Սաղաթելյանը Facebook-ի իր էջում տեղադրել է Արամ Գասպարյանի լուսանկարն ու գրել. «ԱԱԾ փոխգնդապետ Արամ Գասպարյանն ա՝ Ալֆայի Չիկոն։ Արցախյան առաջին պատերազմի մասնակից, ով անցավ ողջ պատերազմը՝ ստանալով հրազենային վիրավորում պարանոցի հատվածում, և միայն հրաշքով ողջ մնաց։ Չնայած առողջական խնդիրներին, մի քանի լուրջ վիրահատությունների՝ թե Ապրիլյան ու թե վերջին պատերազմի առաջին օրերից եղել է Արցախում։ 20 տարի ծառայել է Ազգային անվտանգության ծառայությունում, կանգնած է եղել հայկական «Ալֆա» ջոկատի կերտման ակունքներում։ Պարգևատրվել է
«Մարտական ծառայության» մեդալով, ՀՀ ԱԱԾ և ոստիկանության բազմաթիվ պատվոգրերով, ԱԱԾ հոբելյանական մեդալով: Թոշակի անցնելուց հետո աշխատում է ԶՊՄԿ-ում՝ որպես անվտնագության դեպարտամենտի ղեկավար։ Այսօր «Ալֆան» նրան բերման է ենթարկում՝ առանց որևէ պատճառի կամ բացատրության՝ փաստացի կատարելով քաղաքական պատվեր։ Լրագրողը հարցնում է՝ ինչի՞ համար են Ձեզ տանում, ժպտալով ասում ա եսիմ, երևի կարոտել են նախկին կոլեագներս:
Հ.Գ. երկերոդ նկարը արցած է վիրավորումից կարճ ժամանակ անց։
Տեսանյութը՝ մեկնաբանություններում»:
Ացելի վաղ NEWS.am-ի հետ զրույցում «Հայաստան» դաշինքի անդամ, «Վերածնվող Հայաստան» կուսակցության նախագահ Վահե Հակոբյանը նշել էր, որ առավոտից «Զանգեզուրի պղնձամոլիբդենային կոմբինատ» ՓԲԸ–ի վարչական շենք ներխուժած Ազգային անվտանգության ծառայության «Ալֆա» ջոկատը խուզարկություններ է իրականացնում աշխատասենյակներում, նաեւ առգրավում են համակարգիչներ։
Թե ինչ քրեական գործի մասին է խոսքը, Վահե Հակոբյանը նշեց, որ տեղեկություն չունի։
