Այս ընտրությունները որևէ կերպ չեն լեգիտիմացրել Արցախի մի մասի հանձնումը. Վանեցյան

Արցախի հիմնահարցը փակված չէ։ Այս ընտրությունները որևէ կերպ չեն լեգիտիմացրել Արցախի մի մասի հանձնումը։ Այս մասին հրավիրված ասուլիսին ասաց «Պատիվ ունեմ» դաշինքի առաջնորդ Արթուր Վանեցյանը։ 

Նրա խոսքով՝ Արցախյան հարցը բաց է և պետք է անել ամեն ինչ, որ կարգավորումը դառնա մեր արտաքին քաղաքականության անկյունաքարային հարցերից մեկը։ Ավելին՝ պետք է հստակ օրակարգ բերվի Արցախի ժողովրդի ինքնորոշման իրավունքի իրացումը և

Արցախում այսօր բնակվող մեր հայրենակիցների անվտանգ բնակվելու երաշխիքը։

«Արցախի Հանրապետությունում մարդիկ պետք է ունենան երաշխիքներ, որ նրանք բնակվելու են անվտանգ պայմաններում, որ այլևս երբեք չի լինելու Ադրբեջանի կողմից ուժի կիրառում կամ ուժի սպառնալիք։ Արցախյան հարցի կարգավորումը պետք է լուծվի բացառապես ԵԱՀԿ Մինսկի խմբի շրջանակներում»,- նշեց Վանեցյանը՝ հավելելով, որ այդ հարցի լուծումը պետք է շարունակվի այդ ֆորմատում և այլ տրամաբանություն ընդունելի չէ։

Վանեցյանը հիշեցրեց Փաշինյանի ելույթը, որով վերջինս ակնարկել էր, որ պետք է փոխվի Արցախյան հակամարտության կարգավորման տրամաբանությունը, ինչը, Վանեցյանի դիտարկմամբ, անթույլատրելի է։