Նախարարը մեր գործընկերներին ասել է, թե ՀՀ-ն ականապատ դաշտերի քարտեզներ չունի. Արմեն Գրիգորյանը մեղադրեց Այվազյանին

Այսօր Ազատության հետ զրույցում ԱԽ քարտուղար Արմեն Գրիգորյանը հայտարարեց, որ Հայաստանում կան ուժեր, նույնիսկ պաշտոնյաներ, որոնք փորձել են անվտանգության հարցերը տորպեդահարել: Նա մասնավորապես նշել է գերիների հարցի մասին:

«Մայիսի 27-ից առաջ երկար ժամանակ գերիների հարցը չէր լուծվում: Երբ պարոն Այվազյանը հրաժարական տվեց, գերիների հարցը շատ արագ լուծվեց: Պարոն Այվազյանը, լինելով պաշտոնյա, մեր գործընկերներին ասում էր, որ ականապատ դաշտերի քարտեզները, որոնք մենք արդեն տվել ենք, մենք չունենք: Երբ նա պաշտոնից հրաժարական տվեց, հնարավորություն ստեղծվեց, որ այս հարցը լուծվի»,-ասաց նա:

Ճշտող հարցին՝ Այվազյանը ստո՞ւմ էր, Գրիգորյանը հայտարարեց՝ ոչ միայն ստում էր, այլ նաև տորպեդահարում էր. «Նա ցանկություն չուներ Հայաստանի անվտանգության հարցերը լուծել: Նա ավելի շատ ցանկություն ուներ խնդիրներ լուծել ներքաղաքական թիմի համար:

Նա պաշտոնը լքեց ռազմի դաշտում գտնվելու ժամանակ։ Նա տորպեդահարել է հարցեր լուծելու մեր հնարավորությունը: Նրա հրաժարականից հետո երկու շաբաթվա ընթացքում, հարցը լուծվում է»,-ասաց նա: