Հասարակությանը բևեռացնել են 2 ուժերի շուրջ` Նիկոլ Փաշինյանի և Ռոբերտ Քոչարյանի. Սամվել Բաբայան

«Ազատական» կուսակցության ղեկավար Սամվել Բաբայանը այսօր հրավիրված ասուլիսի ժամանակ հայտարարեց, որ քարոզարշավի շրջանակում «կարողացան» հասարակությանը բևեռացնել 2 ուժերի շուրջ, մարդկանց 2 բևեռների շուրջ բերել` Նիկոլ Փաշինյանի և Ռոբերտ Քոչարյանի:

«20 տարի իմ դեմ հակաքարոզչություն է տարել իշխանությունը, մի մթնոլորտ են ստեղծել, որ Բաբայանը հրեշ է` մարդ է ուտում։ Հիմա այդ ամենը հեշտ չէ կոտրել»,–ասաց Բաբայանը` հավելելով, որ ինքն այս պահին չի տեսնում, որ որևէ քաղաքական ուժ ֆավորիտ է։ 

Նա անդրադարձավ նաև պատերազմին և պարտությանը` ասելով, որ մեղավորը ռազմական գերատեսչության ամբողջ ղեկավարությունն էր։ Բաբայանի խոսքով` եթե որևէ մեկին ձեռնտու է, որ ինքն ասի` իշխանությունն էր մեղավոր, «դավաճան» են, ապա ստիպված է հիասթափեցնել, քանի որ նման բան չի ասելու։ Ըստ նրա` ղեկավարությունը մեղավոր է, որ նման մարդկանց է ռազմական պատասխանատուներ նշանակել։ 

Նա նշեց, որ քննություն է ընթանում, որի շրջանակում ինքն էլ 3-4 անգամ հարցաքննվել է։ Բաբայանը հույս հայտնեց, որ քննության վերջում որոշ հարցերի պատասխաններ կլինեն։