«Ադրբեջանը պատրաստ է բանակցությունների խաղաղության համաձայնագրի ստորագրման շուրջ, սակայն Հայաստանը դեռ չի արձագանքել». Ալիև
Հունիսի 2-ին Եվրոպական խորհրդի նախագահ Շառլ Միշելը հեռախոսազրույց է ունեցել Ադրբեջանի նախագահ Իլհամ Ալիևի հետ, հաղորդում է ադրբեջանական լրատվամիջոցը։
«Զրույցի ընթացքում քննարկվել են 2020թ. նոյեմբերի 10-ին Հայաստանի, Ադրբեջանի և Ռուսաստանի ղեկավարների միջև եռակողմ հայտարարությունից հետո տարածաշրջանում անվտանգության և կայունության ապահովման հարցերը:
Միշելը՝ Եվրոմիության անունից պատրաստակամություն է հայտնել աջակցել սահմանազատման և սահմանանշման գործընթացի մեկնարկին: Շառլ Միշելը կողմերին կոչ է արել համագործակցել այն հարցերի շուրջ, որոնք կապված են պահվող անձանց, ականազերծման և մարդասիրական այլ հարցերի հետ՝ լիակատար թափանցիկության պայմաններում:
Ալիևը նշել է, որ Ադրբեջանը պատրաստ է բանակցություններ սկսել Հայաստանի հետ խաղաղության համաձայնագրի ստորագրման շուրջ, սակայն Հայաստանը դեռ չի արձագանքել այդ կոչին։
Շառլ Միշելը երկու կողմերին կոչ է արել կառուցողական մթնոլորտում բանակցություններ վարել»,- հավելում է լրատվամիջոցը:
