Սկզբունքը խախտեց Ադրբեջանը, մենք խորհրդային մինության սահամաններով էինք շարունակում մեր աշխատանքները․ Ավինյան
ԼՀԿ պատգամավոր Սրբուհի Գրիգորյանն այսօր ԱԺ-ում իշխանություններից հետաքրքրվեց, թե ինչ դիրքորոշում ունեն նրանք սահմանին բուֆերային գոտի ստեղծելու հետ կապված:
Փոխվարչապետի պաշտոնակատար Տիգրան Ավինյանը նշեց՝ բանակցությունների ընթացքում յուրաքանչյուր պետություն կարող է ունենալ իր դիրքորոշումը այն իրավական սկզբունքների վերաբերյալ, որոնք պետք է հիմք ծառայեն դելիմտացիայի և դեմարկացիայի համար:
«Ձեր բարձրաձայնած բուֆերային գոտիների, ջրային ռեսուրսների, անվտանգության գոտիների հարցը երկու կողմերի համար պետք է ընդունելի լինի: Ձեր բարձրաձայնած հարցը, որպես սկզբունք այս գործընթացում անպայման հաշվի է առնվելու: Երբ խոսքը փաստացի գնում է սահմանազատման ու սահմանագծման պրոցեսի մասին, երկու երկրները հաշվի են առնում և իրակավական հիմքերը, և ջրային ռեսուրսները, և ենթակառուցվաքների տեղադիրքը, այս բոլոր հարցերը քննարկման առարկա են»:
Սրբուհի Գրիգորյանի դիտարկմանն ի պատասխան, որ հիմա երկու կողմերը ճիշտ կլինի առաջնորդվեն խորհրդային միության սահմաններով, խաղաղություն լինելու դեպքում նոր կարելի է գնալ դելիմիտացիայի, Ավինյանն ասաց.
«Դե ֆակտո, հենց այս սկզբունքով էլ տեղադրվում էին ժամանակավոր հենակետերը, մինչև Ադրբեջանի կողմից կատարված գործողությունները: Սկզբունքը խախտեց Ադրբեջանը, մենք խորհրդային մինության սահամաններով էինք շարունակում մեր աշխատանքները: Բայց նրանք սկսեցին թելադրել այլ տրամաբանություն, որը մեր կողմից չի ընդունվում ու չի կարող ընդունվել: Քանի դեռ Սև լճի և Գեղարքունիքի հատվածում ադրբեջանական զորքերի դուրս բերում չունենք, չեմ կարծում, որ խելամիտ է պատկերացնել բանակցային հանգիստ գործընթաց»,-եզրափակեց փոխվարչապետը:
