Իսրայելապաղեստինյան ռազմական գործողությունները կարող են ավարտվել առաջիկա օրերին. Associated Press

Իսրայելի կողմից Գազայի հատվածը վերահսկող պաղեստինյան ուժերի դեմ իրականացվող ռազմական գործողությունները մի քանի օրվա ընթացքում կարող են ավարտվել, ТАСС-ի փոխանցմամբ՝ հայտնել է Associated Press գործակալությունը՝ հղում անելով իր աղբյուրներին: 

Հաղորդվում է, որ ԱՄՆ նախագահ Ջո Բայդենը մայիսի 17-ին Իսրայելի վարչապետի հետ ունեցած հեռախոսազրույցում կոչ էր արել դադարեցնել հարվածները Գազայի հատվածի ուղղությամբ: Բացի այդ, իսրայելական կողմին նման կոչեր են փոխանցել ամերիկյան վարչակազմի տարբեր այլ ներկայացուցիչներ: 

Աղբյուրի փոխանցմամբ՝ իսրայելական կողմը, ի պատասխան, շեշտել է, որ իրենց կողմից ռազմական գործողույունների դադարեցման հավանականություն կա:  

Ավելի վաղ Իսրայելի վարչապետ Բենիամին Նեթանյահուն հայտարարել էր՝ Գազայի հատվածի ուղղությամբ իսրայելական բանակի գործողությունները կշարունակվեն այնքան, որքան անհրաժեշտ կլինի: 

Հիշեցնենք, որ պաղեստինցիների և իսրայելցիների միջև անցյալ շաբաթ սկսված բախումների հետևանքով պաղեստինյան կողմում զոհերի թիվը հասել է 212-ի, որոնցից 61-ը երեխա և 34-ը կին, վիրավորվել է մոտ 1500 պաղեստինցի, իսկ իսրայելական կողմում զոհերի թիվը 10-ն է, այդ թվում՝ 2 երեխա։ Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը: Իսրայելի բանակը հայտարարել Է, որ ոչնչացրել Է ՀԱՄԱՍ-ի հետախուզության առանցքային դեմքերի, այդ թվում՝ ՀԱՄԱՍ-ի ռազմական հետախուզության անվտանգության բաժնի ղեկավարին ու նրա տեղակալին: