Հայոց ցեղասպանության ճանաչումը մտրակի և քաղցրաբլիթի խաղի դրսևորում է. Պեսկով կրկին խոսեց Բայդենի հայտարարության մասին
Դմիտրի Պեսկովը հյուրընկալվել է Առաջին ալիքի «Մեծ խաղ» հաղորդմանն ու պատասխանել նաև ԱՄՆ նախագահ Ջո Բայդենի կողմից ապրիլի 24–ին «ցեղասպանություն» եզրույթն օգտագործելուն։
Վաշինգտոնի կողմից Հայոց ցեղասպանության ճանաչումը «մտրակի և քաղցրաբլիթի» խաղի դրսևորում է, ոչ թե կարեկցանք հայ ժողովրդի նկատմամբ: Այս մասին այսօր հայտարարել է ՌԴ նախագահի մամուլի քարտուղար Դմիտրի Պեսկովը Առաջին ալիքի «Մեծ խաղ» հաղորդման եթերում։
«Ես կարծում եմ, որ մեծամասամբ սա է Վաշինգտոնի կողմից Ցեղասպանության ճանաչումը. ամենայն հավանականությամբ` դա մտրակի և քաղցրաբլիթի այս սիրելի խաղի բաղկացուցիչ մասն է։ Դա հայ ժողովրդին կարեկցելու ցանկություն չէ, ցանկություն չէ խորությամբ հասկանալու Օսմանյան կայսրության պատմությունը, Հայաստանի պատմությունը», - կարծում է Կրեմլի ներկայացուցիչը։
Հիշեցնենք` ապրիլի 24-ին՝ Հայոց ցեղասպանության 106-րդ տարելիցին, ԱՄՆ 46-րդ նախագահ Ջո Բայդենը Օսմանյան Թուրքիայում իրագործված զանգվածային սպանությունները որակեց «ցեղասպանություն»: Թուրքիայի առաջնորդ Ռեջեփ Թայիփ Էրդողանի իր հերթին հայտարարեց, որ խորապես վշտացած է իր ամերիկյան գործընկերոջ հայտարարությամբ։
