Հայաստանն ի վիճակի է ինքնուրույն պաշտպանել իր տարածքային ամբողջականությունը. ԱԽ քարտուղար
Հայաստանի Անվտանգության խորհրդի քարտուղար Արմեն Գրիգորյանը РИА Новости-ին տված հարցազրույցում հերքել է երկրի ներքին քաղաքականության վրա Սորոսի ինստիտուտների ազդեցության մասին հայտարարությունը:
«Մեր քաղաքական ուժը ո՛չ արևմտամետ է, ո՛չ էլ արևելամետ: Մենք հայակենտրոն ուժ ենք և առաջնորդվում ենք բացառապես Հայաստանի շահերով: Ինչ վերաբերում է «Սորոսին», կցանկանայի նշել, որ նման հայտարարությունները ծիծաղելի, սահմանափակ մտածողության արդյունք են: Սովորաբար ինձ չեն հետաքրքրում առօրյա մակարդակի հայտարարությունները, առավել ևս՝ մեկնաբանել դրանք, բայց հուսով եմ, որ մեկընդմիշտ կփակեմ այս թեման. քաղաքականության մեջ կարևոր է գնահատել գործողությունները», - ասել է Գրիգորյանը:
Նա կարծում է, որ այս թեման տարածվում է հիմնականում Հայաստանում իշխանությունների քաղաքական ընդդիմախոսների խնդրանքով:
Արմեն Գրիգորյանը հայտարարել է նաև, որ Հայաստանն ի վիճակի է ինքնուրույն պաշտպանել իր տարածքային ամբողջականությունը:
«Հայաստանն իր ուժերով և դաշնակից ներուժով ի վիճակի է պաշտպանել իր պետության տարածքային ամբողջականությունը», - ասել է Անվտանգության խորհրդի քարտուղարը:
