Տպավորություն է, որ ԳՇ նոր պետին նշանակել են բանակը ամբողջությամբ քանդվի. Մովսես Հակոբյան

Այո, վարչապետն իրավունք ունի ազատելու ԳՇ պետին, բայց հարց է առաջանում՝ հիմքերը որոնք են: Այս մասին, այսօր՝ մարտի 23-ին, լրագրողների հետ հանդիպման ժամանակ նշեց ՀՀ ԶՈՒ ԳՇ նախկին պետ Մովսես Հակոբյանը:

«Եթե Օնիկ Գասպարյանը հանցագործ է, քրեական գործ հարուցեք, եթե վատ է աշխատում, ապացուցեք, եթե քաղաքական հայտարարություն է արել, քրեական գործ հարուցեք: Սրանք չեք անում, սակայն ազատում եք պաշտոնից:

Ավելին ասեմ, Օնիկ Գասպարյանին կարող են ազատել նաև կարգապահական տույժի արդյունքում, սակայն դրա համար ծառայողական քննություն պետք է անցկացվի, ինչը չի արվել: Իհարկե, կանոնագիրքը թույլ է տալիս ազատել պաշտոնից որպես կարգապահական տույժ, բայց որպես կանոն դրան պետք է նախորդեն մի քանի տույժեր, իսկ Օնիկ Գասպարյանը մի քանի օր առաջ գեներալ-գնդապետի կոչում է ստացել, ինչը չէր կարող ստնալ, եթե ունենար տույժեր»,-ասաց նա:

Մովսես Հակոբյանը նկատեց, որ զինվորականները առաջնորդվում են ներքին ծառայության կանոնագրքով, որի առաջին գլխում այսպիսի կետ կա. «Եթե զինվորական օրենքները հակասում են միմյանց, ապա ներքին ծառայության կանոնագիրքը գերակա է մնացած օրենքների նկատմամբ։ Եւ այստեղ միանձնյա ղեկավարման սկզբունքը չպետք է խաթարվի։ Զինվորականը հրամանը կատարում է, ապա նոր բողոքարկում։

Եթե վաղը բողոքարկեն, որ Օնիկ Գասպարյանի դեմ օրենքը կիրառվել է անօրինական, այն օրենքը հետադարձ ուժ չի ունենա: Որեւէ մեկը չի կարող վերադառնալ այդ պաշտոնին: Օրենքը պահանջում է, որ այն անձը, որը կիրառել է անօրեն հրաման, կարող է ենթարկվել պատասխանատվության»:

Խոսելով ԳՇ պետի պաշտոնում Արտակ Դավթյանի նշանակման մասին՝ Մովսես Հսկոբյանը հիշեցրեց, որ ԳՇ նորանշանակ պետի թեկնածությունը այդքան էլ ցանկալի չէր իր համար:

«Ես մի անգամ էլ եմ ասել, որ տպավորություն է՝ Արտակ Դավթյանին նշանակել են ապացուցելու համար, որ 44-օրյա պատերազմից հետո բանակը քանդված չէ եւ նշանակել են, որ ամբողջությամբ քանդվի»: