Գերիների վերադարձի համար կառավարության արած քայլերը բավարար չեն. «Իմ քայլը» լքած պատգամավոր

Խորը տեղյակ չեմ, թե ոնց են բանակցում, ինչ են անում, բայց եթե կարճ ձևակերպեմ, կարելի է ասել, որ բավարար չէ, բավարարից էլ քիչ է: Այս մասին լրագրողների հետ զրույցում հայտարարեց ԱԺ պատգամավոր Վարդան Աթաբեկյանը՝ խոսելով գերիների վերադարձի մասին:

Պատգամավորի խոսքերով, գերիների հարցը պետք է լիներ պայմանագրի առաջին կետը. «Քանի գերիներին չեն տվել, սահմանազատման գործընթացը պետք է դադարեցվեր: Ադրբեջանը գերիների մասին կետը մինչև վերջ չի կատարում, իսկ մենք հլու հնազանդ բոլոր կետերը կատարում ենք, ինձ համար դա անհասկանալի է»:

Պատգամավորը չի կարծում, թե կառավարությունը չի ուզում լուծել գերիների հարցը. «Այն, թե որքանով են մնացած կատարած քայլերը խանգարում, որ այդ հարցը լուծվի, դա իրենք կիմանան:

Դու կարող ես մեծ ցանկություն ունենալ հարցը լուծելու, սակայն ձեր մյուս գործողությունները կարող են խանգարել: Այն պայմանագիրը, որը դու ստորագրել ես, մնացած կետերը կատարել ես ու գերիների հարցը թողել ես, այդ գործողությունը քեզ ուժ չի տալիս, խանգարում է, որ այդ հարցը լուծես:

Բայց էլի եմ ուզում նշել, որ կառավարությունը հաստատ ամենաշատն է ուզում լուծել գերիների հարցը: Մենք նաև չհասկացանք, թե ինչու Մոսկվայում չքննարկվեց հարցը»: