Մեկ մարդ զոհվել է, ևս 6-ի վիրավորվել են իրաքյան Էրբիլում տեղի ունեցած հրթիռակոծության հետևանքով: Այս մասին հայտնում է Известия-ն՝ հղում տալով «Անսասան վճռականություն» գործողության պաշտոնական ներկայացուցիչ Ուեյն Մարոտտոյին:

Իր խոսքով՝ սպանվել է 1 քաղաքացիական աշխատակից, 5-ը տուժել են, վիրավորում է ստացել նաև 1 ԱՄՆ զինծառայող:

Ավելի վաղ ԶԼՄ-ները գրել էին, որ հարձակման հետևանքով տուժել է 2-3 քաղաքացիական անձ:

Փետրվարի 15-ի երեկոյան հայտնի դարձավ, որ Իրաքյան Քուրդիստանի մայրաքաղաք Էրբիլի միջազգային օդանավակայանի տարածքը հրթիռակոծության է ենթարկվել: Լրագրողների խոսքով՝ հինգ հրթիռ է ընկել օդանավակայանի հարակից տարածքում, որոնցից երկուսը գտնվում էին ամերիկյան ռազմաբազայի անմիջական հարևանությամբ, իսկ մյուսը ՝ Չինաստանի դեսպանատան մոտակայքում գտնվող բնակելի տարածքում:

«Ալ Սումա» հեռուստաալիքի հաղորդմամբ՝ հարձակման թիրախը ամերիկյան ռազմաբազան է եղել: