![Այս պահին մենք հաստատում ենք 161 հատ 8,5 մետրանոց ավտոբուսների գնումը. քաղաքապետ](https://auroranews.am/storage/img/base_image/old/c6768029f5d795f8ec5acb83cfa6fa79.webp)
Այս պահին մենք հաստատում ենք 161 հատ 8,5 մետրանոց ավտոբուսների գնումը. քաղաքապետ
![Այս պահին մենք հաստատում ենք 161 հատ 8,5 մետրանոց ավտոբուսների գնումը. քաղաքապետ](https://auroranews.am/storage/img/base_image/old/c6768029f5d795f8ec5acb83cfa6fa79.webp)
Բոլորիդ հայտնի է, որ անգլիական WYG ընկերությունը մեզ համար նոր ավտոբուսային ցանց է նախագծել ըստ որի 850 ավտոբուս պետք է ունենանք, որից 450-ը պետք է լինեն 7,5-8,5 մետրանոց ավտոբուսներ, մնացածը՝ 12 եւ 18 մետրանոց ավտոբուսներ: Այս մասին այսօր՝ փետրվարի 12-ին, Երեւանի ավագանու արտահերթ նիստում նշեց քաղաքապետ Հայկ Մարությանը:
«Այս պահին մենք հաստատում ենք 161 հատ 8,5 մետրանոց ավտոբուսների գնումը: Սա բավականին բավական երկար ու դժվար աշխատանք է պահանջել: Առկա պայմաններում շատ գործարարներ վախենում են պայմանագրեր կնքել թե համայնքի, թե պետական մասշտաբով, բայց մենք եկել ենք, վստահեցրել ենք, որ կկատարենք մեր պարտավորությունները, իրենք էլ կկատարեն մատակարարումը:
Ծրագիրը պետք է շարունակական լինի:
Նաեւ ՎԶԵԲ-ի եւ կառավարության հետ համատեղ 1 անգամ չի կայացել 12 մետրանոց ավտոբուսների գնման տենդերը: Եվս մեկ անգամ տենդեր է դրվել, որը կբացվի մարտի 31-ին: Հուսանք, որ այս անգամ կկայանա: Այստեղ 100 հատ 12 մետրանոց ավտոբուսների մասին է խոսքը»,-ասաց նա:
Մարությանի խոսքով, այս ծրագրի իրագործման արդյունքում կձերբազանտվենք միկրոավտոբուսներից, որոնք եւ վտանգավոր են, եւ պրոբլեմատիկ են, եւ անհարմար են. «Ուզում ենք այս առաջին քայլով ձերբազատվենք միկրոավտոբուսներից»:
Քաղաքապետը հավելեց, որ 7,5-8,5 մետրանոց ավտոբուսներ 95 տոկոսով արտադրում են միայն Չինաստանում. «Չինաստանում ավտոբուսների արտադրությունը շատ առաջ է գնացել, եւ շատ գերմանական, շվեդական, հոլանդական շատ քաղաքներում տենդերները հաղթում են հենց չինական ավտոբուսները, հատկապես էլեկտրաբուսները՝ որակով անցնելով եվրոպական շատ արտադրողների: Այստեղ մեզ համար ոչ թե երկիրն է, որ արտադրում է, այլ թե ինչ պարամետրերի է համապատասխանում, իսկ մենք բարձր պարամետրեր ենք դրել:
Բավականին շատ լավ գին ենք ստացել այս որակի ավտոբուսների համար: Եթե գործարքը կայանա, կհամարեմ սա լավագույն ձեռքբերումը Երեւանի համար»: