Նիկոլ Փաշինյանի հրաժարականը պահանջող քաղաքացիներն այսօր բողոքի ավտոերթ են իրականացրել. մի շարք վարորդների նկատմամբ արձանագրություն է կազմվել

ՀՀ վարչապետ Նիկոլ Փաշինյանի հրաժարականը պահանջող քաղաքացիներն այսօր բողոքի ավտոերթ են իրականացնում Երևանում։ Ավտոմեքենաների ապակիներին փակցված է «Նիկոլ Դավաճան», «Նիկոլ, հեռացիր» գրառումները, իսկ մեքենաներից դուրս հայոց եռագույնն է։

Մի շարք փողոցներով պտտվելուց հետո երթի մասնակիցները Ամիրյանով փորձեցին մտնել Հանրապետության հրապարակ։ Սակայն այստեղ ոստիկանությունը արգելեց նրանց հրապարակում մեքենաներով պտույտ գործել։

Ավտոարշավի մասնակիցները փորձեցին ոստիկաններից ճշտել` ինչու են իրենց արգելում մտնել հրապարակ և ինչու խոչընդոտում երթի իրականացմանը։

«Արձանագրենք, որ ոստիկանությունն առանց հիմքի սահմանափակում է մեր ազատ տեղաշարժվելու իրավունքը»,–ասաց ակցիայի մասնակիցներից մեկը։ 

«Հիմք կա,–պատասխանեց Երևանի փոխոստիկանապետը` նշելով, որ խաթարում են այլոց իրավունքները։  Բանակցություններից հետո ոստիկանությունը բացեց ճանապարհը, և երթի մասնակիցները պտտվեցին Հանրապետության հրապարակով։

Մի շարք վարորդների նկատմամբ արձանագրություն կազմվեց` ազդանշան միացնելու համար։