ԱՄՆ-ն նոր պատժամիջոցներ է սահմանել Բելառուսի դեմ

ԱՄՆ պատժամիջոցային ցանկում ընդգրկվել են Բելառուսի Կենտրոնական ընտրական հանձնաժողովին, ՆԳ առաջին փոխնախարար Գենադի Կազակևիչին և մի շարք ուժային ստորաբաժանումներ:

Ինչպես փոխանցում է РИА Новости-ն՝ վկայակոչելով ԱՄՆ ֆիննախարարության կայքում հրապարակված հայտարարությունը, ցուցակներում հայտնվել են նաև ՊԱԿ «Ալֆա» ջոկատը, Մինսկի քաղաքային գործադիր կոմիտեի ներքին գործերի գլխավոր վարչությունը, Մինսկի հատուկ նշանակության ոստիկանական ջոկատը:

Նշվում է, որ պատժամիջոցներն ուղղված են ֆիզիկական և իրավանական անձանց դեմ, որոնք պատասխանատու են կամ մասնակցել են Բելառուսում ժողովրդավարական գործընթացները կանխող գործողություններին:

Ուժային կառույցները պատժամիջոցային ցանկերում հայտնվել են երկրում տեղի ունեցող բողոքի ցույցերը ճնշելու համար:

Հիշեցնենք, որ Բելառուսում բազմաթիվ բողոքի ցույցեր են տեղի ունեցել օգոստոսի 9-ին կայացած նախագահական ընտրություններից հետո, որի արդյունքների հետ համամիտ չեն ընդդիմադիրներն ու նրանց կողմնակիցները: Ըստ ԿԸԿ-ի հրապարակած տվյալների՝ ընտրություններում հաղթանակ էր տարել երկրի գործող նախագահ Ալեքսանդր Լուկաշենկոն՝ ստանալով ձայների ավելի քան 80 տոկոսը: