Սեյրան Օհանյանը պատմել է` իրականում ինչ է տեղի ունեցել Արցախում
Վարչապետը որոշել էր, որ փորձառու գեներալներն իրավունք չունեն հրամանատարական կետ այցելելու, Արայիկ Հարությունյանն ինձ անձամբ արգելեց գնալ այնտեղ։ Այս մասին «Արմնյուզ» ՀԸ «ՕրաԽնդիր» հաղորդման ժամանակ հայտարարել է ՀՀ պաշտպանության նախկին նախարար, գեներալ-գնդապետ, Արցախի հերոս Սեյրան Օհանյանը:
«Ես եւ գեներալ Խաչատուրովը պատերազմի առաջին օրը գնացել ենք ՊՆ, երկու օր շարունակ մեզ չընդունեցին։ Ես որոշեցի ինքնակամ մեկնել Արցախ՝ աջակցելու ՊԲ-ին, ներկայացա Արայիկ Հարությունյանին, ապա մեկնեցի հրամանատարական կետ։ Սեպտեմբերի 30-ին ես արդեն պնդում էի, որ ՀՀ եւ Արցախի իշխանությունները պետք է ամեն ինչ անեն՝ վերականգնեն բանակցային գործընթացը։
Վարչապետը որոշել էր, որ փորձառու գեներալներն իրավունք չունեն հրամանատարական կետ այցելելու, Արայիկ Հարությունյանն ինձ անձամբ արգելեց գնալ այնտեղ»,- եթերում պատմել է Սեյրան Օհանյանը։
Ըստ նախկին նախարարի՝ իրեն արգելվել է մասնակցել ռազմական գործողությունների ծրագրմանը, փոխարենն առաջարկել են զորահավաքային, աշխարհազորային ռեսուրսի հարցերը հոգալ։
«Ես իմ նախաձեռնությամբ աջակցություն եմ ցուցաբերել Շուշիի աշխարհազորի ձեւավորմանը»,- նշել է Արցախի հերոսն ու ավելացրել, որ նոյեմբերի 5-ին երեք կողմից շրջափակման մեջ են եղել, գործել է՝ ըստ իրավիճակի, իսկ բանակի հրամանատարությունն իր հետ կապ հաստատելու փորձ չի արել։
Դառնալով այդ օրերին որոշ շրջանակների կողմից սոցիալական ցանցերում շրջանառության մեջ դրված այն լուրերը, թե, իբր, կռվի ժամանակ փախուստի է դիմել է՝ Ս.Օհանյանը նշել է.«Իմ ֆիզիկական վիճակից ելնելով՝ չէի կարող փախչել, թող չշահարկեն։ Նոյեմբերի 6-ի առավոտյան մենք լքել ենք քաղաքը, քանի որ բանակի ղեկավարությունը որոշել էր տեղափոխել հրամանատարական կետը»:
Ասում է` ԱՀ նախագահ Արայիկ Հարությունյանի հետ խորհրդակցելուց հետո մեկնել է ՊԲ հրամանատարի մոտ, երեք օր գտնվել հրամանատարական կետում և փորձել չխանգարելով` խորհուրդներ տալ, առաջարկություններ անել մարտական գործողությունների, նաև օպերատիվ շարվածքում վերախմբավորումներ անելու վերաբերյալ։
Մի քանի օր անց որոշում է կայացվել, որ փորձառու զինվորականներից շատերը, այդ թվում Սեյրան Օհանյանն իրավունք չունեն հրամանատարական կետում լինելու։
Օհանյանի խոսքով՝ երբ մարտական գործողությունները մոտեցել են Շուշիին, սեփական նախաձեռնությամբ գնացել է տեղի հրամանատարության մոտ։
Նա հերքում է տարածվող այն տեղեկությունները, թե ինքը ղեկավարել է Շուշիի մարտական գործողությունները։ Ասում է` համապատասխան աջակցություն է ցուցաբերել. միայն այդքանը, հրամանատարական որևէ գործառույթ չի ունեցել։
«Այդ իրավիճակում յուրաքանչյուրն անցնում էր իմ կողքով, հարցնում էին՝ ինչ անենք, ասում էի՝ թողեք, գնացեք։ Շատերն ասել են՝ պարոն Օհանյան, Ձեզ օգնենք, հանենք, որովհետև ես միայնակ՝ ոտքով, չէի կարող դա անել։ Վերջում բանակի հրամանատարությունը որոշեց հրամանատարական կետը տեղափոխել, ապահովեցին հրամանատարական կետի տեղափոխումը, որովհետև այնուհետև հրթիռահրետանային հարվածներ պետք է հասցնեին նաև հրամանատարական կետի մերձակայքին, որովհետև տեղը բացահայտված էր»,- նշեց Սեյրան Օհանյանը։
Ինչ վերաբերում է Շուշիում «Իսկանդերի» հարվածին, Սեյրան Օհանյանն ասում է, որ այդ մասին տեղեկություններ չունի։
