Փարիզից 3-րդ ինքնաթիռը ժամանեց Երևան

2020 թ. դեկտեմբերի 11-ին Փարիզից մեկնած երրորդ ինքնաթիռը վայրէջք կատարեց Երևանում` բերելով «Ազնավուր» հիմնադրամի և նրա գործընկերների կողմից հավաքագրված մարդասիրական օգնությունը (անվասայլակներ, պատգարակներ, քայլակներ, բժշկական սարքավորումներ, դիմակներ, դեղամիջոցներ, խնամքի պարագաներ և հագուստ), ինչպես նաև ՅՈՒՆԻՍԵՖ-ի կողմից տրամադրված դպրոցական պարագաներ և «Վեոլիա» հիմնադրամի կողմից Ազնավուրի հիմնադրամին նվիրաբերած հիգիենայի պարագաներ և ծածկոցներ: Այս մասին տեղեկանում ենք հիմնադրամի ֆեյսբուքյան էջից։ 

Օգնությունը կբաշխվի Լեռնային Ղարաբաղում պատերազմից տուժած բնակչությանը՝ մեր գործընկերների հետ համագործակցությամբ: Մարդասիրական օգնություն տեղափոխող երրորդ թռիչքը նույնպես իրականացվում է Ֆրանսիայի կառավարության շնորհիվ, Եվրոպայի նախարարության ճգնաժամային և աջակցության կենտրոնի, ինչպես նաև Արտաքին գործերի նախարարության կորդինացմամբ: Չվերթի ընդունող պաշտոնական կողմը Հայաստանում Ֆրանսիայի դեսպանությունն է՝ դեսպան Ջոնաթան Լաքոտի գլխավորությամբ: 
Այս համընդհանուր մոբիլիզացիայի շրջանակներում նոյեմբերին ֆրանսիական կառավարության կողմից արդեն իսկ վարձակալվել էր երկու ինքնաթիռ՝ Հայաստանին մարդասիրական օգնություն տրամադրելու համար: 

«Կցանկանայինք մեկ անգամ ևս մեր անկեղծ երախտագիտությունը հայտնել բոլոր կազմակերպություններին և անհատներին, որոնք մեզ օգնեցին հավաքագրել անհրաժեշտ ապրանքները Ֆրանսիայում և Շվեյցարիայում: Մեր համագործակցությունը շարունակական բնույթ է կրում, և շուտով չորրորդ ինքնաթիռն էլ կժամանի Երևան՝ բերելով բժշկական սարքավորումներ, հիգիենայի պարագաներ և տաք հագուստ: 

«Մենք հավատարիմ ենք մարդկային արժեքներին, քանի դեռ պատրաստ ենք ձեռք մեկնել նրանց, ովքեր կարիքի մեջ են: Հավատում ենք, որ միայն միասնականությամբ կարող ենք հաղթահարել այս դժվար ժամանակները: Ցանկանում եմ իմ ջերմությունն ու սերը փոխանցել արցախցի եղբայրներին ու քույրերին»,- նշեց «Ազնավուր» հիմնադրամի գործադիր տնօրեն Քրիստինա Ազնավուրը: