Ինչու է Հայաստան հիմնադրամից գումար փոխանցվել պետբյուջե. նախարարը պարզաբանում է

ՀՀ պետբյուջե «Հայաստան» համահայկական հիմնադրամի միջոցների մի մասի փոխանցման մասին որոշումն ընդունվել է Հոգաբարձուների խորհրդի որոշման հիման վրա: Այս մասին այսօր ԱԺ նիստում 2021 թվականի բյուջեի նախագծի քննարկման ժամանակ հայտարարեց ՀՀ ֆինանսների նախարար Ատոմ Ջանջուղազյանը:

Նրա խոսքով՝ նման միջոցները կազմել են 101 մլրդ դրամ: «Այդ միջոցները փոխանցվել են պետբյուջե հիմնադրամի հաշիվներից՝ ելնելով ռազմական դրությունից եւ դրանից բխող նոր ծախսերից»,-նշեց նախարարը:

Նա ընդգծեց, որ իր հիմնադրման պահից հիմնադրամի նպատակն է եղել համահայկական ցանցի ստեղծումը: Այդ խնդիրը, Ջանջուղազյանի խոսքով, հաջողությամբ իրականացվել է, որի վկայությունն է ավելի քան 3000 ծրագրերի իրականացումը: «Այդ համատեքստում Համահայկական հիմնադրամը եզակի կառույց է, որի նպատակներից մեկն է աջակցել Հայաստանի, Ղարաբաղի եւ Սփյուռքի կայուն զարգացմանը: Սակայն ռազմական գործողություններն ու ռազմական դրությունը նոր ծախսեր առաջացրեցին սոցիալական եւ բժշկական խնդիրների լուծման, ենթակառուցվածքների պահպանման համար»,-նշեց նախարարը:

Իր հերթին, կառավարությունը՝ ի դեմս ֆինանսների նախարարության, պարտավորվել է օգտագործել այդ ռեսուրսները բացառապես ըստ նշանակության: Նախարարը նշեց, որ նվիրատվությունների մասին պայմանագրում կա կետ, որում ասվում է, որ ֆիննախը փաստաթղթի դրույթների իրականացման մասին հաշվետվություն է տրամադրում: «Այդ հաշվետվությունը ներկայացվել է: Միջոցներն օգտագործվել են ՀՀ կառավարության որոշման հիման վրա եւ կներկայացվեն երկրի գլխավոր տնտեսական փաստաթղթի կատարման մասին հաշվետվության մեջ»,-եզրափակեց նախարարը: