ՀՀ-ում որևէ երկրի լրատվամիջոցները չէ, որ որոշում են, թե ով է ՀՀ վարչապետը. Փաշինյան
Վարչապետ Նիկոլ Փաշինյանը խորհրդարանում հարցուպատասխանի ժամանակ նշեց, որ իրենց մեծագույն խնդիրն է, որ տեղի ունեցող բոլոր գործընթացներում ՀՀ ժողովուրդը որևէ կերպ ու որևէ պատճառով չկորցնի Հայաստանում իշխանություն ձևավորելու ազատ կամարտահայտման իր իրավունքը:
«ՀՀ-ում որևէ երկրի լրատվամիջոցները չէ, որ որոշում են, թե ով է Հայաստանի Հանրապետության վարչապետը, և պիտի շարունակի այդպես լինել»,- ասաց նա:
Անդրադառնալով Գևորգ Գորգիսյանի հարցին Նիկոլ Փաշինյանը հորդորեց առանձին վերցված խմբերի ձայները չշփոթել ժողովրդի ձայնի հետ: Հարցուպատասխանի ընթացքում՝ պատասխանելով «Լուսավոր Հայաստան» խմբակցության քարտուղար Գևորգ Գորգիսյանի հարցին, թե ինչու վարչապետը հրաժարական չի ներկայացնում՝ անսալով ժողովրդի կոչերին:
«Ժողովրդի անունից խոսելու հնարավորություն պետք է ունենա ժողովուրդը, մեր մեծագույն խնդիրն է այնպես անել, որ ժողովուրդը խոսելու, արտահայտվելու հնարավորություն ունենա և մենք առանձին վերցված խմբերի ձայները չշփոթենք ժողովրդի ձայնի հետ»,- ասաց Փաշինյանը:
Վարչապետը նշեց, որ իր և կառավարության մեծագույն անելիքը համարում է այնպես անելը, որ Հայաստանում ժողովրդի իշխանությունը որևէ վերնագրի ներքո վտանգի չենթարկվի:
