Իրարանցում ԱԺ-ում՝ Լենա Նազարյանի հայտարարությունից հետո

Այսօր Աազգային ժողովում ԱԺ փոխխոսնակ Լենա Նազարյանը հայտարարեց, որ հայտնի հայտարարության ստորագրման օրը կառավարություն մտնողների շարքերում, անվտանգության աշխատակիցների հավաստմամբ, եղել է ԲՀԿ-ական պատգամավորներից Դավիթ Մանուկյանը:

Այս խոսքերից հետո ԲՀԿ-ական պատգամավորները սկսեցին տեղից արձագանքել՝ հերքելով դա ու հայտարարելով, որ ԲՀԿ-ական պատգամավորների սենյակները լրջորեն տուժել են, իսկ իրենք ոչ մեկ անգամ են կոչ արել, որ չի կարելի նման գործողությունների գնալ:

Ազգային ժողովում կրքերը խիստ բորբոքվեցին, ինչից հետո Լիլիթ Մակունցը 20 րոպե ընդմիջում խնդրեց կրքերը թուլացնելու համար:

Իվետա Տոնոյանն իր հերթին հայտարարեց, որ Մակունցն ընդմիջում խնդրում է իրենց պատգամավորներին բերման ենթարկելու ու քվորում ապահովելու համար, ինչը պարզից էլ պարզ է. «Այստեղ նյարդերի տեղին տալու հանգամանքի մասին խոսելն ավելորդ է»:

Տոնոյանը հայտարարեց, որ Նազարյանը ստահոդ տեղեկություններ է տարածում. «Այդ բախումների օրը ձեր խմբակցությունից որևէ մեկը ներկա չի եղել ու չի փորձել հանդարտեցնել մարդկանց»։

Ի վերջո ընդմիջումը հայտարարվեց, Նազարյանը պատգամավորներին խնդրեց լքել նիստերի դահլիճը: