Շվեդիան կշարունակի աջակցել երկարաժամկետ ղարաբաղյան կարգավորման հասնելու ջանքերին

Այս տարվա վերջին ԵԱՀԿ նախագահությունը ստանձնող Շվեդիան կշարունակի աջակցել ղարաբաղյան հակամարտության երկարաժամկետ եւ տեւական լուծման հասնելու ջանքերին: Ինչպես հաղորդում է «Արմենպրեսը», այս մասին ասել է Շվեդիայի արտաքին գործերի նախարար Անն Լինդեն` պատասխանելով Շվեդիայի խորհրդարանի անդամ Բյորն Սյոդերի եւ Ռոբերտ Հալեֆի հարցերին:

«Կառավարությունը ողջունում է այն փաստը, որ Հայաստանն ու Ադրբեջանը պայմանավորվել են հրադադարի մասին: Այժմ մենք փորձում ենք ավելի շատ տեղեկություններ ստանալ ձեռք բերված պայմանավորվածությունների եւ դրանց կյանքի կոչման մասին: Հասկանալի է, որ հակամարտությունը դեռ չի ավարտվել, դեռ շատ հարցեր կան լուծելու: Ահա թե ինչու ԵԱՀԿ-ն եւ միջազգային հանրությունը պետք է հավատարիմ մնան տեւական, երկարաժամկետ բանակցային կարգավորմանը: Տարվա վերջին, ստանձնելով ԵԱՀԿ նախագահությունը, ես կշարունակեմ աջակցել այդ ջանքերին»,- ասել է Լինդեն:

Նա հավելել է, որ Լեռնային Ղարաբաղի հակամարտության գոտում ռազմական գործողությունները բուռն են եղել, որի հետեւանքով մարդիկ տուժել են եւ պատճառվել է զգալի վնաս: «Շվեդիան դատապարտում է քաղաքացիական անձանց եւ քաղաքացիական ենթակառուցվածքների դեմ հարձակումները: Պետք է հարգել միջազգային մարդասիրական իրավունքի նորմերը: Մարդասիրական իրավիճակը շատ կարեւոր է: Տասնյակ հազարավոր քաղաքացիական անձինք ստիպված են եղել լքել հակամարտության գոտին, ավերվել են բնակավայրեր, քաղաքացիական օբյեկտներ, ինչպիսիք են դպրոցներն ու հիվանդանոցները»,- ասել է Շվեդիայի արտգործնախարարը:

Նրա խոսքով՝ իրավիճակը բարդացել է կորոնավիրուսի տարածման պատճառով, ինչին իշխանությունները չեն կարող պատշաճ կերպով արձագանքել մարտական գործողությունների պատճառով: