Ավելի քան 200 ռուս խաղաղապահներ արդեն ժամանել են Հայաստան. ՌԴ ՊՆ
ԻԼ-76 ինքնաթիռներով Հայաստան են ժամանել ավելի քան 200 ռուս խաղաղապահներ, ՌԴ ՊՆ-ին հղումով գրում է ՏԱՍՍ գործակալությունը։
«Ներկայում ռուսական խաղաղապահ ուժերի հրամանատարության սպաների և 15-րդ խաղաղապահ բրիգադի ստորաբաժանումների զինծառայողների հետ ԻԼ-76 ռազմատրանսպորտային ավիացիայի 12 ինքնաթիռ է վայրէջք կատարել Հայաստանի Հանրապետությունում։ Ռազմատրանսպորտային ավիացիայի ինքնաթիռները տեղափոխել են ավելի քան 200 զինծառայող, զրահամեքենաներ, զրահամեքենաներ և կապի միջոցներ»,- ասված է հաղորդագրության մեջ:
Նախարարությունում հիշեցրել են, որ Լեռնային Ղարաբաղի հակամարտության գոտում ընդհանուր առմամբ կտեղակայվի 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա:
Ավելի վաղ ՌԴ նախագահ Վլադիմիր Պուտինը հայտնել էր, որ ՌԴ-ն, Ադրբեջանը և Հայաստանը Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել:
Իր հերթին, ՀՀ վարչապետ Նիկոլ Փաշինյանը հայտնել էր, որ Ռուսաստանի և Ադրբեջանի նախագահների հետ ղարաբաղյան պատերազմը ժամը 01:00-ից դադարեցնելու մասին հայտարարություն է ստորագրել:
«Հայտարարության տեքստը, որ արդեն հրապարակվել է, անասելի ցավոտ է անձամբ ինձ և մեր ժողովրդի համար: Այդ որոշումը կայացրել եմ ռազմական իրադրության խորը վերլուծության և այդ իրադրությանը ամենալավը տիրապետող մարդկանց գնահատականի արդյունքում: Նաև հիմնվելով այն համոզմունքի վրա, որ ստեղծված իրավիճակում սա հնարավոր ամենալավ հանգուցալուծումն է: Այս ամենի մասին առաջիկա օրերին հանդես կգամ մանրամասն ուղերձով»,- ասել է նա:
