Իսրայելում ՀՀ դեսպանը շարունակում է մնալ Երևանում. Աննա Նաղդալյան
Իսրայելից ետ կանչված ՀՀ-ը դեսպանն այդյո՞ք շարունակում է մնալ Երևանում, և ինչ քայլեր են ձեռնարկվում. այս մասին այսօր հարցրել են ՀՀ ԱԳ մամուլի խոսնակ Աննա Նաղդալյանին։
«Դեսպանը շարունակում է մնալ Երևանում, իսկ ինչ վերաբերում է Ադրբեջանին զենքի վաճառքի վերաբերյալ հայկական դիրքորոշմանը, այն արտահայտվել է հստակ: Չպետք է զինվի մի պետություն, որը չի խորշում այդ զենքն օգտագործել քաղաքացիկան բնակչության և քաղաքացիական ենթակառուցվածքների դեմ, որին մենք ականատես ենք եղել այս ամբողջ մեկ ամսվա ընթացքում»,- ասել է Աննա Նաղդալյանը:
Հարցին, թե լուրեր են շրջանառվում, որ Իսրայելը Հայաստանին հումանիտար օգնություն է առաջարկել, Աննա Նաղդալյանը պատասխանել է.
«Կարևոր ենք համարում, որ Իսրայելը դադարեցնի զենքի վաճառքը Ադրբեջանին. նախևառաջ պետք է դադարեցնել Ադրբեջանին զինումը և նրա ռազմական կարողությունների ամրապնդումը: Մենք ունենք մի իրողություն, երբ ցեղասպանություն վերապրած պետությունը աջակցում է ցեղասպան նկրտումներ դրսևորող և ահաբեկչություն ֆինանսավորող այլ պետություններին»:
