Զոհրաբ Մնացականյանը հեռախոսազրույց է ունեցել Սերգեյ Լավրովի հետ
ՌԴ ԱԳ նախարար Սերգեյ Լավրովը և Հայաստանի ԱԳ նախարար Զոհրաբ Մնացականյանը կիրակի հեռախոսազրույցի ընթացքում քննարկել են ԼՂ հակամարտության գոտում ստեղծված իրավիճակից դուրս գալու եղանակները:
«Ուշադրության կենտրոնում գտնվել են ղարաբաղյան հակամարտության գոտում ստեղծված իրավիճակից դուրս գալու եղանակների որոնմանն առնչվող հարցերը: Լավրովը մտահոգություն է հայտնել հակամարտության գոտում խաղաղ բնակչության շրջանում զոհերի թվի աճի առնչությամբ»,- ասվում է ՌԴ ԱԳՆ հաղորդագրության մեջ:
Ռուսական կողմը վերահաստատել է պատրաստակամությունն աջակցել կողմերին՝ ղարաբաղյան կարգավորման գործընթացը ԵԱՀԿ Մինսկի խմբի համանախագահների հովանու ներքո քաղաքական և դիվանագիտական հուն վերադարձնելու վերաբերյալ՝ համաձայն Ռուսաստանի, ԱՄՆ-ի և Ֆրանսիայի նախագահների համատեղ հայտարարության:
