Զելենսկին չեղարկել է իր այցը Բելառուս

Ուկրաինան չեղարկել է երկրի նախագահ Վլադիմիր Զելենսկիի հոկտեմբերին ծրագրված այցը Բելառուս ու մասնակցությունը երկու երկրների տարածաշրջանային համաժողովին, որը պետք է տեղի ունենար Գրոդնոյում: Այս մասին տեղեկացնում է korrespondent.net կայքը` հղում տալով Ուկրաինայում Բելառուսի դեսպան Իգոր Սոկոլին:

Նրա խոսքերով` հուլիսին Բելառուսի կառավարության անունից համաժողովի հրավերներ էին ուղարկվել Ուկրաինայի շրջանների բոլոր ղեկավարներին: Օգոստոսի դրությամբ Ուկրաինայի շրջանների մոտ կեսը համաձայնվել էր մասնակցել համաժողովին:

Համաժողովի ընթացքում պետք է մշակվեր նաև Զելենսկիի պաշտոնական այցը Բելառուս:

«Տառացիորեն մի քանի օր առաջ ուկրաինական կողմը մեզ դիմել է համաժողովը 2021 թվական հետաձգելու խնդրանքով: Փաստացիորեն համատեղ նախապատրաստական աշխատանքը չեղարկվել է: Քանի որ Ուկրաինայի ղեկավարությունը հարաբերությունները «դադարի վրա» է դրել, նշանակում է կշարունակենք աշխատել շրջանների, քաղաքների, գյուղական խորհուրդների և բիզնեսի հետ»,-հայտարարել է դեսպանը:

Նա նշել է նաև, որ Ուկրաինայի նման որոշման պատճառով տուժում են առաջին հերթին երկու երկրների տնտեսություններն ու միջշրջանային կապերը: