Իրար «քիթ մտած» ենք գնում. երթուղայիններում չե՞ն վարակվում. տուգանողներն ինչու լուծում չեն գտնում

Auroranews-ը բազմաթիվ ահազանգեր է ստանում Երեւանի տրանսպորտային հիմնախնդիրների հետ կապված: Քաղաքացիները մասնավորապես նշում են. «Մեզ տուգանում են երբ փողոցում 5 րոպե շնչելու համար դիմակ ենք իջեցնում, բայց պայմաններ չեն ապահովում, որ երթուղայիններով կարողանանք նորմալ տեղաշարժվել: Դուրս եկեք ցանկացած կանգառ, տեսեք գտնելո՞ւ եք դատարկ երթուղային: Իրար «քիթ մտած» գնում ենք աշխատանքի, նույն ձևով հետ ենք գալիս տուն: Եղել են դեպքեր, որ աշխատանքից դուրս գալուց հետո մեկ ժամ սպասել ենք կանգառում` հույսով, որ գոնե կանգնած, բայց ոչ գերբեռնված երթուղայիններով կգնանք, սակայն անիմաստ»: 

Բողոքող քաղաքացիներ խոսքով` իշխանություններն աչք են փակում այս ամենի վրա. «Աչքփակոցի է սա: Բա ո՞ւր են մեզ համար տուգանքներ սահմանած իշխանության ներկայացուցիչները: Դրսում քայլելուց տուգանում են, վախենում են, թե կվարակվենք, թե վիրուսի երկրորդ ալիք կլինի, բայց որևէ լուծում չեն կարողանում գտնել, որ մարդիկ երթուղայիններում իրարից 20 սմ հեռավորություն կարողնանա պահել: Ամեն ինչ մակերեսային ու ձևական անելով հո չի: Թե մտածում են, որ մեր ստացած չնչին աշխատավարձերն էլ պետք է տանք տաքսինեերին»: 

Auroranews-ը կապ հաստատեց Երևանի քաղաքապետարանի մամուլի խոսնակ Հակոբ Կարապետյանի հետ` հասկանալու համար, թե արդյոք Երևանում կրճատվել է երթուղայինների թիվը: 

«Շուրջ 15 տոկոսով կրճատվել է Երևանի երթուղայինների թիվը:  Տարբեր պատճառներով 187 երթուղային այլևս չի աշխատում: Որոշների շահագործման ժամկետներն են լրացել, որոշ գծատերեր էլ պարզապես կրճատել են երթուղայինների թիվը», - նշեց քաղաքապետարանի մամուլի խոսնակը: 

Պարոն Կարապետյանը նշեց, որ մինչև այս տարվա վերջ100 նոր մինի ավտոբուսով կհամալրվի Երևանի երթուղային ցանցը: 

«Մի խմբաքանակի համար էլ պատրաստվում ենք նոր մրցույթ հայտարարել, այս անգամ էլ նախատեսում ենք ավտոբուսներ գնել»,- նշեց մեր զրուցակիցը»: